ڈر نہیں مجھ کو گناہوں کی گراں باری کا

ڈر نہیں مجھ کو گناہوں کی گراں باری کا

تیری رحمت ہے سبب میری سبک ساری کا

دار نے اک سگ دنیا کو یہ بخشا ہے عروج

ہے فرشتوں میں بھی چرچا مری دیں داری کا

دل و جاں سونپ چکے ہم تجھے اے جان جہاں

اب ہمیں خوف ہی کیا اپنی گرفتاری کا

جان بھی چیز ہے کوئی کہ رکھیں تم سے دریغ

پاس اتنا بھی نہ ہو رسم وفاداری کا

ساقیا سب کو تری ایک نظر کافی تھی

تھا کسے ہوش ترے عہد میں ہشیاری کا

میں فدا آج بھی ہو جائے وہی ایک نگاہ

خاتمہ ہو کہیں اس دور کی خودداری کا

عاشقوں کے لیے ہے دار ہی داروئے شفا

عشق کی طب میں دوا نام ہے بیماری کا

اجل استادہ ہے بالیں پہ مریض غم عشق

آنکھ تو کھول ذرا وقت ہے بیداری کا

جوہرؔ اور حاجب و درباں کی خوشامد کیا خوب

عرش و کرسی پہ گزر ہے ترے درباری کا

dar nahin mujh ko gunahon ki giran bari ka

teri rahmat hai sabab meri subuk sari ka

dar ne ik sag-e-duniya ko ye bakhsha hai uruj

hai farishton mein bhi charcha miri den dari ka

dil-o-jan saunp chuke ham tujhe ai jan-e-jahan

ab hamen khauf hi kya apni giraftari ka

jan bhi chiz hai koi ke rakhen tum se daregh

pas itna bhi na ho rasm-e-wafadari ka

saqiya sab ko tiri ek nazar kafi thi

tha kise hosh tire ahd mein hushyari ka

main fida aj bhi ho jae wahi ek nigah

khatima ho kahin is daur ki khuddari ka

ashiqon ke liye hai dar hi daru-e-shifa

ishq ki tib mein dawa nam hai bimari ka

ajal istada hai balin pe mariz-e-gham-e-ishq

ankh to khol zara waqt hai bedari ka

jauhar aur hajib-o-darban ki khushamad kiya khub

arsh-o-kursi pe guzar hai tire darbari ka