بہت ہی پردے میں اظہار آرزو کرتے

بہت ہی پردے میں اظہار آرزو کرتے

نگاہیں کہتی ہیں ہم ان سے گفتگو کرتے

شراب ناب سے ساقی جو ہم وضو کرتے

حرم کے لوگ طواف خم و سبو کرتے

وہ مل کے دست حنائی سے دل لہو کرتے

ہم آرزو تو حسیں خون آرزو کرتے

دروغ بافی دشمن کا حال کیا کھلتا

جو پردہ چاک بھی ہوتا تو وہ رفو کرتے

اتار لاتے انہیں بام طور سے دل میں

ہم اختیار وہ انداز گفتگو کرتے

ڈرے وہ کیوں مرے پھولوں میں آتی مل کے حنا

یہ پھول خاک تمنائے رنگ و بو کرتے

کلیم کو نہ غش آتا نہ طور ہی جلتا

دبی زبان سے اظہار آرزو کرتے

جو ظرف آب ہمیں میکدے میں مل جاتا

نماز کعبے میں پڑھتے یہاں وضو کرتے

مہ صیام میں موقع جو شب کو مل جاتا

تو ایک سانس میں خالی خم و سبو کرتے

شراب پیتے ہی سجدے میں ان کو گرنا تھا

یہ شغل بیٹھ کے مے نوش قبلہ رو کرتے

ہر ایک قطرے سے بہتی ریاض جوئے شراب

جو پی کے ہم سر زمزم کبھی وضو کرتے

bahut hi parde mein izhar-e-arzu karte

nigahen kahti hain ham un se guftugu karte

sharab-e-nab se saqi jo ham wuzu karte

haram ke log tawaf-e-kham-o-subu karte

wo mil ke dast-e-hinai se dil lahu karte

ham arzu to hasin khun-e-arzu karte

darogh bafi dushman ka hal kya khulta

jo parda chak bhi hota to wo rafu karte

utar late unhen bam-e-tur se dil mein

ham ikhtiyar wo andaz-e-guftugu karte

dare wo kyun mire phulon mein ati mil ke hina

ye phul khak tamanna-e-rang-o-bu karte

kalim ko na ghash ata na tur hi jalta

dabi zaban se izhar-e-arzu karte

jo zarf-e-ab hamen maikade mein mil jata

namaz kaabe mein parhte yahan wuzu karte

mah sayyam mein mauqaa jo shab ko mil jata

to ek sans mein khali kham-o-subu karte

sharab pite hi sajde mein un ko girna tha

ye shaghl baith ke mai nosh qibla ro karte

har ek qatre se bahti riyaz ju-e-sharab

jo pi ke ham sar zamzam kabhi wuzu karte