چشم ملت میں مکیں کون ہے آغا شورش

چشم ملت میں مکیں کون ہے آغا شورش

گوشۂ دل کے قریں کون ہے آغا شورش

شعر و انشا کی بہاریں ہیں بہاریں جس سے

وہ بہاروں سے حسیں کون ہے آغا شورش

جس پہ بے تول خزانے بھی لٹا کے نہ ہوں سیر

بے بہا در‌ ثمیں کون ہے آغا شورش

جس کی جانکاہیٔ ایثار سے زنداں بھی تھا طور

وہ درخشندہ نگیں کون ہے آغا شورش

کس کی بے باکی کردار ہے ایماں افروز

غیرت دیر نشیں کون ہے آغا شورش

جس کو یورپ کا مقامر نہ کبھی جیت سکے

نرد ناصید مکیں کون ہے آغا شورش

جس جواں فکر کی تقریر سے باطل لرزے

وہ جواں عزم و یقیں کون ہے آغا شورش

کس کی کرنوں میں نئے سانحے پڑھ سکتے ہیں

ہند کی تاب جبیں کون ہے آغا شورش

عزم و ایثار کا اک پیکر بیدار و بلند

ہمدم زار و حزیں کون ہے آغا شورش

پوچھا ساقی سے مئے تند نے مستی چلائی

مرد پایندہ تریں کون ہے آغا شورش

شورشیں آپ کی ہیں معنیٔ نو سے لبریز

امن عالم کا امیں کون ہے آغا شورش

chashm-e-millat mein makin kaun hai agha shorish

gosha-e-dil ke qarin kaun hai agha shorish

sher-o-insha ki baharen hain baharen jis se

wo baharon se hasin kaun hai agha shorish

jis pe be tol khazane bhi luta ke na hun sair

be baha dar-e-samin kaun hai agha shorish

jis ki jankahi-e-isar se zindan bhi tha tur

wo darakhshinda nagin kaun hai agha shorish

kis ki be baki kirdar hai iman afroz

ghairat-e-dair nashin kaun hai agha shorish

jis ko yorap ka muqamir na kabhi jit sake

nard nasaid makin kaun hai agha shorish

jis jawan fikr ki taqrir se batil larze

wo jawan azm-o-yaqin kaun hai agha shorish

kis ki kirnon mein nae sanehe parh sakte hain

hind ki tab-e-jabin kaun hai agha shorish

azm-o-isar ka ik paikar-e-bedar-o-buland

hamdam-e-zar-o-hazin kaun hai agha shorish

puchha saqi se mai tund ne masti chillai

mard-e-painda tiren kaun hai agha shorish

shorishen ap ki hain maani-e-nau se labrez

amn alam ka amin kaun hai agha shorish