بہت رہا ہے کبھی لطف یار ہم پر بھی

بہت رہا ہے کبھی لطف یار ہم پر بھی

گزر چکی ہے یہ فصل بہار ہم پر بھی

عروس دہر کو آیا تھا پیار ہم پر بھی

یہ بیسوا تھی کسی شب نثار ہم پر بھی

بٹھا چکا ہے زمانہ ہمیں بھی مسند پر

ہوا کیے ہیں جواہر نثار ہم پر بھی

عدو کو بھی جو بنایا ہے تم نے محرم راز

تو فخر کیا جو ہوا اعتبار ہم پر بھی

خطا کسی کی ہو لیکن کھلی جو ان کی زباں

تو ہو ہی جاتے ہیں دو ایک وار ہم پر بھی

ہم ایسے رند مگر یہ زمانہ ہے وہ غضب

کہ ڈال ہی دیا دنیا کا بار ہم پر بھی

ہمیں بھی آتش الفت جلا چکی اکبرؔ

حرام ہو گئی دوزخ کی نار ہم پر بھی

bahut raha hai kabhi lutf-e-yar ham par bhi

guzar chuki hai ye fasl-e-bahar ham par bhi

urus-e-dahr ko aya tha pyar ham par bhi

ye beswa thi kisi shab nisar ham par bhi

bitha chuka hai zamana hamen bhi masnad par

hawa kiye hain jawahir nisar ham par bhi

adu ko bhi jo banaya hai tum ne mahram-e-raz

tu fakhr kya jo hua etibar ham par bhi

khata kisi ki ho lekin khuli jo un ki zaban

to ho hi jate hain do ek war ham par bhi

ham aise rind magar ye zamana hai wo ghazab

ke dal hi diya duniya ka bar ham par bhi

hamen bhi atish-e-ulfat jala chuki akbar

haram ho gai dozakh ki nar ham par bhi