چست کمر کا کیا سبب تنگ قبا کی وجہ کیا

چست کمر کا کیا سبب تنگ قبا کی وجہ کیا

ہم تو ہیں آپ سر بکف ہم سے ادا کی وجہ کیا

خاک میں جو ملا ہو خود اس پہ ستم سے کیا حصول

حسن کی یہ سرشت ہے ورنہ جفا کی وجہ کیا

اپنی ہیں جیسی خصلتیں مجھ پہ بھی ہے گماں وہی

یہ نہیں گر سبب تو پھر ترک وفا کی وجہ کیا

مشرب عشق میں دلا کفر ہے یار سے ریا

جب کہ بتوں کا دھیان ہو ذکر خدا کی وجہ کیا

آج کیے ہزار قتل کل کیے اور بھی سوا

شغل یہ جس نگہ کا ہو اس کو حیا کی وجہ کیا

روح و جسد کا سابقہ کتنے دنوں کا ہے بھلا

دونوں کی جنس دو ہے جب ان میں وفا کی وجہ کیا

صدمۂ درد و رنج و غم طول فراق کا الم

ہیں یہ حوادثات چند ان کی بقا کی وجہ کیا

سن لیں جو وہ زہے نصیب گر نہ سنیں تو کیا گلہ

ہے یہ انہیں سے گفتگو ترک دعا کی وجہ کیا

مالک دل ہیں جب وہی جب ہے انہیں کا اختیار

مرتکب گناہ کیوں جرم و خطا کی وجہ کیا

روئے ہیں ہم ضرور شادؔ تب تو ہے لب پہ آہ سرد

مینہ نہ برس گیا تو پھر ٹھنڈی ہوا کی وجہ کیا

chust kamar ka kya sabab tang qaba ki wajh kya

ham to hain ap sar bakaf ham se ada ki wajh kya

khak mein jo mila ho khud us pe sitam se kya husul

husn ki ye sarisht hai warna jafa ki wajh kya

apni hain jaisi khaslaten mujh pe bhi hai guman wahi

ye nahin gar sabab to phir tark-e-wafa ki wajh kya

mashrab-e-ishq mein dila kufr hai yar se riya

jab ke buton ka dhyan ho zikr-e-khuda ki wajh kya

aj kiye hazar qatl kal kiye aur bhi siwa

shaghl ye jis nigah ka ho us ko haya ki wajh kya

ruh-o-jasad ka sabiqa kitne dinon ka hai bhala

donon ki jins-e-do hai jab un mein wafa ki wajh kya

sadma-e-dard-o-ranj-o-gham tul-e-firaq ka alam

hain ye hawadisat chand un ki baqa ki wajh kya

sun len jo wo zahe nasib gar na sunen to kya gila

hai ye unhen se guftugu tark-e-dua ki wajh kya

malik-e-dil hain jab wahi jab hai unhen ka ikhtiyar

murtakib-e-gunah kyun jurm-o-khata ki wajh kya

roe hain ham zarur shad tab to hai lab pe ah-e-sard

menh na baras gaya to phir thandi hawa ki wajh kya