Arooz is now on the App Store, for iPhone and iPad. Download →

All poetry

آخر کو عشق کفر سے ایمان ہو گیا

Dagh Dehlvi (1831–1905)

آخر کو عشق کفر سے ایمان ہو گیا

میں بت پرستیوں سے مسلمان ہو گیا

مے تو حلال ہے جو پئے ڈھب سے بادہ نوش

میں توبہ کر کے اور پشیمان ہو گیا

رندان بے ریا کی ہے صحبت کسے نصیب

زاہد بھی ہم میں بیٹھ کے انسان ہو گیا

اس غنچے میں سمائی ہے وحشت برنگ بو

دل کتنی تنگیوں پہ بیابان ہو گیا

لو اے بتو سنو کہ وہ داغؔ صنم پرست

مسجد میں جا کے آج مسلمان ہو گیا