چاک کی خواہش، اگر وحشت بہ عُریانی کرے

چاک کی خواہش، اگر وحشت بہ عُریانی کرے

صبح کے مانند، زخمِ دل گریبانی کرے

جلوے کا تیرے وہ عالم ہے کہ، گر کیجے خیال

دیدۂ دل کو زیارت گاہِ حیرانی کرے

ہے شکستن سے بھی دل نومید، یارب! کب تلک

آبگینہ کوہ پر عرضِ گِرانجانی کرے

میکدہ گر چشمِ مستِ ناز سے پاوے شکست

مُوئے شیشہ دیدۂ ساغر کی مژگانی کرے

خطِّ عارض سے، لکھا ہے زُلف کو الفت نے عہد

یک قلم منظور ہے، جو کچھ پریشانی کرے

ہاتھ پر گر ہاتھ مارے یار وقتِ قہقہہ

کرمکِ شب تاب آسا مِہ پر افشانی کرے

وقت اس افتادہ کا خوش، جو قناعت سے اسدؔ

نقشِ پائے مور کو نقشِ سلیمانی کرے

chak ki khwahish, agar wahshat ba uryani kare

subh ke manind, zakhm-e-dil garebani kare

jalwe ka tere wo alam hai ke, gar kije khayal

dida-e-dil ko ziyarat gah-e-hairani kare

hai shaksatan se bhi dil naumid, yarab! kab talak

abgina koh par arz-e-giranijani kare

maikada gar chashm-e-mast-e-naz se pawe shikast

mu-e-shisha dida-e-saghar ki mizhgani kare

khat-e-ariz se, likha hai zulf ko ulfat ne ahd

yak qalam manzur hai, jo kuchh pareshani kare

hath par gar hath mare yar waqt-e-qahqaha

kirmk-e-shab tab asa meh par afshani kare

waqt is uftada ka khush, jo qanaat se asad

naqsh-e-pae mor ko naqsh-e-sulaimani kare