چاہت مری چاہت ہی نہیں آپ کے نزدیک

چاہت مری چاہت ہی نہیں آپ کے نزدیک

کچھ میری حقیقت ہی نہیں آپ کے نزدیک

کچھ قدر تو کرتے مرے اظہار وفا کی

شاید یہ محبت ہی نہیں آپ کے نزدیک

یوں غیر سے بے باک اشارے سر محفل

کیا یہ مری ذلت ہی نہیں آپ کے نزدیک

عشاق پہ کچھ حد بھی مقرر ہے ستم کی

یا اس کی نہایت ہی نہیں آپ کے نزدیک

اگلی سی نہ راتیں ہیں نہ گھاتیں ہیں نہ باتیں

کیا اب میں وہ حسرتؔ ہی نہیں آپ کے نزدیک

chahat miri chahat hi nahin ap ke nazdik

kuchh meri haqiqat hi nahin ap ke nazdik

kuchh qadr to karte mire izhar-e-wafa ki

shayad ye mohabbat hi nahin ap ke nazdik

yun ghair se be bak ishare sar-e-mahfil

kya ye miri zillat hi nahin ap ke nazdik

ushshaq pe kuchh had bhi muqarrar hai sitam ki

ya us ki nihayat hi nahin ap ke nazdik

agli si na raten hain na ghaten hain na baten

kya ab main wo hasrat hi nahin ap ke nazdik