پھرتا رہتا ہوں میں ہر لحظہ پس جام شراب

پھرتا رہتا ہوں میں ہر لحظہ پس جام شراب

مجھ کو بد نام کرے گی ہوس جام شراب

قافلہ عیش کا تیار ہے رندوں کے لیے

قلقل شیشۂ مے ہے جرس جام شراب

جنبش باد سحر سے ہے تموج مے میں

قوت جان حزیں ہے نفس جام شراب

خم لنڈھا دوں تو نہ چکرائے کبھی سر میرا

ایک جرعہ میں گیا بو الہوس جام شراب

مجھ سے پوچھو اثر بادۂ گلگوں واعظ

میں ہوں رندوں میں بہت نکتہ رس جام شراب

ٹکٹکی باندھ کے دیکھا کیا اتنا کہ بنا

سایۂ مردم دیدہ مگس جام شراب

مے نہ ہو بو ہی سہی کچھ تو ہو رندوں کے لئے

اسی حیلہ سے بجھے گی ہوس جام شراب

زلف مشکیں کے لیے بو جو چلی آتی ہے

ہے نسیم سحری ہم نفس جام شراب

ہم نے رندوں کا مقولہ یہ سنا ہے شیداؔ

صحبت عیش میں زاہد ہے خس جام شراب

phirta rahta hun main har lahza pas jam-e-sharab

mujh ko bad nam karegi hawas jam-e-sharab

qafila aish ka tayyar hai rindon ke liye

qulqul-e-shisha-e-mai hai jaras jam-e-sharab

jumbish-e-bad-e-sahar se hai tamawwuj mai mein

quwwat-e-jan-e-hazin hai nafas jam-e-sharab

kham lundha dun to na chakarae kabhi sar mera

ek jura mein gaya bu alhawas jam-e-sharab

mujh se puchho asar-e-bada-e-gulgun waiz

main hun rindon mein bahut nukta ras jam-e-sharab

tiktiki bandh ke dekha kya itna ke bana

saya-e-mardum-e-dida magas jam-e-sharab

mai na ho bu hi sahi kuchh to ho rindon ke liye

isi hila se bujhegi hawas jam-e-sharab

zulf-e-mushkin ke liye bu jo chali ati hai

hai nasim-e-sahari ham nafas jam-e-sharab

ham ne rindon ka maqula ye suna hai shaida

sohbat-e-aish mein zahid hai khas jam-e-sharab