پھر چراغِ لالہ سے روشن ہوئے کوہ و دمن

پھر چراغِ لالہ سے روشن ہوئے کوہ و دمن

مجھ کو پھر نغموں پہ اُکسانے لگا مُرغِ چمن

پھُول ہیں صحرا میں یا پریاں قطار اندر قطار

اُودے اُودے، نیلے نیلے، پیلے پیلے پیرہن

برگِ گُل پر رکھ گئی شبنم کا موتی بادِ صبح

اور چمکاتی ہے اس موتی کو سورج کی کرن

حُسنِ بے پروا کو اپنی بے نقابی کے لیے

ہوں اگر شہروں سے بن پیارے تو شہر اچھّے کہ بَن

اپنے من میں ڈوب کر پا جا سراغِ زندگی

تُو اگر میرا نہیں بنتا نہ بن، اپنا تو بن

من کی دنیا! من کی دنیا سوز و مستی، جذب و شوق

تن کی دنیا! تن کی دنیا سُود و سودا، مکر و فن

من کی دولت ہاتھ آتی ہے تو پھر جاتی نہیں

تن کی دولت چھاؤں ہے، آتا ہے دَھَن جاتا ہے دَھَن

من کی دنیا میں نہ پایا میں نے افرنگی کا راج

من کی دنیا میں نہ دیکھے مَیں نے شیخ و برہَمن

پانی پانی کر گئی مجھ کو قلندر کی یہ بات

تُو جھُکا جب غیر کے آگے، نہ من تیرا نہ تن

phir charagh-e-lala se raushan hue koh-o-daman

mujh ko phir naghmon pe uksane laga murgh-e-chaman

phul hain sahra mein ya pariyan qatar andar qatar

ude ude, nile nile, pile pile pairahan

barg-e-gul par rakh gai shabnam ka moti bad-e-subh

aur chamkati hai is moti ko suraj ki kiran

husn-e-be parwa ko apni be naqabi ke liye

hun agar shahron se ban pyare to shahr achchhe ke ban

apne man mein dub kar pa ja suragh-e-zindagi

tu agar mera nahin banta na ban, apna to ban

man ki duniya! man ki duniya soz-o-masti, jazb-o-shauq

tan ki duniya! tan ki duniya sud-o-sauda, makr-o-fan

man ki daulat hath ati hai to phir jati nahin

tan ki daulat chhaon hai, ata hai dhan jata hai dhan

man ki duniya mein na paya main ne afrangi ka raj

man ki duniya mein na dekhe main ne shaikh-o-barahman

pani pani kar gai mujh ko qalandar ki ye bat

tu jhuka jab ghair ke age, na man tera na tan