پان کھا کر سرمہ کی تحریر پھر کھینچی تو کیا

پان کھا کر سرمہ کی تحریر پھر کھینچی تو کیا

جب مرا خوں ہو چکا شمشیر پھر کھینچی تو کیا

اے مہوس جب کہ زر تیرے نصیبوں میں نہیں

تو نے محنت بھی پئے اکسیر پھر کھینچی تو کیا

گر کھنچے سینہ سے ناوک روح تو قالب سے کھینچ

اے اجل جب کھنچ گیا وہ تیر پھر کھینچی تو کیا

کھینچتا تھا پاؤں میرا پہلے ہی زنجیر سے

اے جنوں تو نے مری زنجیر پھر کھینچی تو کیا

دار ہی پر اس نے کھینچا جب سر بازار عشق

لاش بھی میری پئے تشہیر پھر کھینچی تو کیا

کھینچ اب نالہ کوئی ایسا کہ ہو اس کو اثر

تو نے اے دل آہ پر تاثیر پھر کھینچی تو کیا

چاہیئے اس کا تصور ہی سے نقشہ کھینچنا

دیکھ کر تصویر کو تصویر پھر کھینچی تو کیا

کھینچ لے اول ہی سے دل کی عنان اختیار

تو نے گر اے عاشق دلگیر پھر کھینچی تو کیا

کیا ہوا آگے اٹھائے گر ظفرؔ احسان عقل

اور اگر اب منت تدبیر پھر کھینچی تو کیا

pan kha kar surma ki tahrir phir khinchi to kya

jab mira khun ho chuka shamshir phir khinchi to kya

ai mahos jab ke zar tere nasibon mein nahin

tu ne mehnat bhi piye iksir phir khinchi to kya

gar khinche sina se nawak ruh to qalib se khinch

ai ajal jab khinch gaya wo tir phir khinchi to kya

khinchta tha paon mera pahle hi zanjir se

ai junun tu ne miri zanjir phir khinchi to kya

dar hi par us ne khincha jab sar-e-bazar-e-ishq

lash bhi meri piye tashhir phir khinchi to kya

khinch ab nala koi aisa ke ho us ko asar

tu ne ai dil ah par tasir phir khinchi to kya

chahiye us ka tasawwur hi se naqsha khinchna

dekh kar taswir ko taswir phir khinchi to kya

khinch le awwal hi se dil ki inan-e-ikhtiyar

tu ne gar ai ashiq-e-dilgir phir khinchi to kya

kya hua age uthae gar zafar ehsan-e-aql

aur agar ab minnat-e-tadbir phir khinchi to kya