وہ کبھی مل جائیں تو کیا کیجئے

وہ کبھی مل جائیں تو کیا کیجئے

رات دن صورت کو دیکھا کیجئے

چاندنی راتوں میں اک اک پھول کو

بے خودی کہتی ہے سجدہ کیجئے

جو تمنا بر نہ آئے عمر بھر

عمر بھر اس کی تمنا کیجئے

عشق کی رنگینیوں میں ڈوب کر

چاندنی راتوں میں رویا کیجئے

پوچھ بیٹھے ہیں ہمارا حال وہ

بے خودی تو ہی بتا کیا کیجئے

ہم ہی اس کے عشق کے قابل نہ تھے

کیوں کسی ظالم کا شکوہ کیجئے

آپ ہی نے درد دل بخشا ہمیں

آپ ہی اس کا مداوا کیجئے

کہتے ہیں اخترؔ وہ سن کر میرے شعر

اس طرح ہم کو نہ رسوا کیجئے

wo kabhi mil jaen to kya kijiye

rat din surat ko dekha kijiye

chandni raton mein ik ik phul ko

be khudi kahti hai sajda kijiye

jo tamanna bar na ae umr bhar

umr bhar us ki tamanna kijiye

ishq ki ranginiyon mein dub kar

chandni raton mein roya kijiye

puchh baithe hain hamara hal wo

be khudi tu hi bata kya kijiye

ham hi us ke ishq ke qabil na the

kyun kisi zalim ka shikwa kijiye

ap hi ne dard-e-dil bakhsha hamen

ap hi us ka mudawa kijiye

kahte hain akhtar wo sun kar mere sher

is tarah ham ko na ruswa kijiye