وہ کہتے ہیں رنجش کی باتیں بھلا دیں

وہ کہتے ہیں رنجش کی باتیں بھلا دیں

محبت کریں خوش رہیں مسکرا دیں

غرور اور ہمارا غرور محبت

مہ و مہر کو ان کے در پر جھکا دیں

جوانی ہو گر جاودانی تو یا رب

تری سادہ دنیا کو جنت بنا دیں

شب وصل کی بے خودی چھا رہی ہے

کہو تو ستاروں کی شمعیں بجھا دیں

بہاریں سمٹ آئیں کھل جائیں کلیاں

جو ہم تم چمن میں کبھی مسکرا دیں

عبادت ہے اک بے خودی سے عبارت

حرم کو مے مشک بو سے بسا دیں

وہ آئیں گے آج اے بہار محبت

ستاروں کے بستر پہ کلیاں بچھا دیں

بناتا ہے منہ تلخی مے سے زاہد

تجھے باغ رضواں سے کوثر منگا دیں

جنہیں عمر بھر یاد آنا سکھایا

وہ دل سے تری یاد کیونکر بھلا دیں

تم افسانۂ قیس کیا پوچھتے ہو

ادھر آؤ ہم تم کو لیلیٰ بنا دیں

یہ بے دردیاں کب تک اے درد غربت

بتوں کو پھر ارض حرم میں بسا دیں

وہ سرمستیاں بخش اے رشک شیریں

کہ خسرو کو خواب عدم سے جگا دیں

ترے وصل کی بے خودی کہہ رہی ہے

خدائی تو کیا ہم خدا کو بھلا دیں

انہیں اپنی صورت پہ یوں ناز کب تھا

مرے عشق رسوا کو اخترؔ دعا دیں

wo kahte hain ranjish ki baten bhula den

mohabbat karen khush rahen muskura den

ghurur aur hamara ghurur-e-mohabbat

mah-o-mehr ko un ke dar par jhuka den

jawani ho gar jawidani to ya rab

tiri sada duniya ko jannat bana den

shab-e-wasl ki be khudi chha rahi hai

kaho to sitaron ki shamen bujha den

baharen simat aen khul jaen kaliyan

jo ham tum chaman mein kabhi muskura den

ibadat hai ik be khudi se ibarat

haram ko mai mushk bu se basa den

wo aenge aj ai bahar-e-mohabbat

sitaron ke bistar pe kaliyan bichha den

banata hai munh talkhi-e-mai se zahid

tujhe bagh-e-rizwan se kausar manga den

jinhen umr bhar yad ana sikhaya

wo dil se tiri yad kyunkar bhula den

tum afsana-e-qais kya puchhte ho

idhar ao ham tum ko laila bana den

ye be dardiyan kab tak ai dard-e-ghurbat

buton ko phir arz-e-haram mein basa den

wo sarmastiyan bakhsh ai rashk-e-shirin

ke khusrau ko khwab-e-adam se jaga den

tire wasl ki be khudi kah rahi hai

khudai to kya ham khuda ko bhula den

unhen apni surat pe yun naz kab tha

mire ishq ruswa ko akhtar dua den