وہیں سے جب کہ اشارہ ہو خود نمائی کا

وہیں سے جب کہ اشارہ ہو خود نمائی کا

عجب کہ بندہ نہ دعویٰ کرے خدائی کا

ملے جو رتبہ ترے در کی جبہہ‌ سائی کا

تو ایک سلسلہ ہو شاہی‌ و گدائی کا

نہیں ہے فیض میں خست ولیک پیدا ہے

تفاوت آئنہ و‌‌ سنگ میں صفائی کا

یہاں جو عشق ہے بیتاب جلوۂ دیدار

وہاں بھی حسن محرک ہے خود نمائی کا

بتوں کے سامنے بت گر گھسے جبین نیاز

میں شیفتہ ہوں تری شان کبریائی کا

نہ کر کسی کی برائی نہ بن بھلے سے برا

بھلا بھلا ہے برا کام ہے برائی کا

بنائیں بگڑی ہوئی کو تو ایک بات بھی ہے

بگاڑنا نہیں مشکل بنی بنائی کا

اٹھا حجاب تو بس دین و دل دئے ہی بنی

جناب شیخ کو دعویٰ تھا پارسائی کا

تمہارے دل سے کدورت مٹائے تو جانیں

کھلا ہے شہر میں اک محکمہ صفائی کا

ہوس ہے گر سر و ساماں کے جمع کرنے کی

تلاش کر سر و سامان بے نوائی کا

سوائے عشق نہیں کوئی رہبر چالاک

وہاں خرد کو نہیں حوصلہ رسائی کا

اسی کا وصف ہے مقصود شعر خوانی سے

اسی کا ذکر ہے منشا غزل سرائی کا

نہیں ہے اب کے زمانہ کی یہ روش زنہار

میں یادگار ہوں ؔخاقانیؔ و سنائی کا

wahin se jab ke ishara ho khud numai ka

ajab ke banda na daawa kare khudai ka

mile jo rutba tire dar ki jabha sai ka

to ek silsila ho shahi-o-gadai ka

nahin hai faiz mein khissat wilyak paida hai

tafawut aina-o-sang mein safai ka

yahan jo ishq hai betab jalwa-e-didar

wahan bhi husn muharrik hai khud numai ka

buton ke samne but gar ghise jabin-e-niyaz

main shefta hun tiri shan kibriyai ka

na kar kisi ki burai na ban bhale se bura

bhala bhala hai bura kam hai burai ka

banaen bigri hui ko to ek bat bhi hai

bigarna nahin mushkil bani banai ka

utha hijab to bas din-o-dil diye hi bani

janab-e-shaikh ko daawa tha parsai ka

tumhare dil se kudurat mitae to janen

khula hai shahr mein ik mahkama safai ka

hawas hai gar sar-o-saman ke jama karne ki

talash kar sar-o-saman-e-be nawai ka

siwae ishq nahin koi rahbar-e-chalak

wahan khirad ko nahin hausla rasai ka

usi ka wasf hai maqsud sher khwani se

usi ka zikr hai mansha ghazal sarai ka

nahin hai ab ke zamana ki ye rawish zinhar

main yadgar hun khaqani-o-sunai ka