وہ رم شعار مرا شوخ دیدہ آیا تھا — پنڈت جواہر ناتھ ساقی (Pandit Jawahar Nath Saqi)

وہ رم شعار مرا شوخ دیدہ آیا تھا

وہ عشوہ سنج کشیدہ کشیدہ آیا تھا

کیا ہے چشم مروت نے آج مائل مہر

میں ان کی بزم سے کل آب دیدہ آیا تھا

جو راز دل تھا وہ خلوت میں سب کہا ہم نے

کوئی بھی ساتھ نہیں تھا جریدہ آیا تھا

وہ مرغ بسمل الفت فدائے حسن ترا

بہ شکل طائر رنگ پریدہ آیا تھا

وہ تیرے جذب محبت کا شوق مستانہ

جنوں لباس گریباں دریدہ آیا تھا

تمہارا بلبل کشمیر شیفتہ شیدا

بہار جلوہ لئے اک قصیدہ آیا تھا

ستم ظریف ہیں پیر مغاں بھی مے خوارو

کہاں سرور میں ساقیؔ ندیدہ آیا تھا