تجھ بدن پر جو لال ساری ہے — فائز دہلوی (Faez Dehlvi)

تجھ بدن پر جو لال ساری ہے

عقل اس نے مری بساری ہے

بال دیکھے ہیں جب سوں میں تیرے

زلف سی دل کوں بے قراری ہے

قد الف سا ہوا مرا جیوں دال

عشق کا بوجھ سخت بھاری ہے

سب کے سینے کو چھید ڈالا ہے

پلک تیری مگر کٹاری ہے

اوڑھنی اودی پر کناری زرد

گرد شب کے سرج کی دھاری ہے

قہر و لطف و تبسم و خندہ

تیری ہر اک ادا پیاری ہے

ترچھی نظراں سوں دیکھنا ہنس ہنس

مور سے چال تجھ نیاری ہے

زندہ فائزؔ کا دل ہوا تجھ سوں

حسن تیرا بی فیض باری ہے