واں زیرکی پسند نہ ادراک چاہئے

واں زیرکی پسند نہ ادراک چاہئے

عجز و نیاز دیدۂ نمناک چاہئے

آئینہ بن کہ شاہد و مشہود ایک ہے

اس روئے پاک کو نظر پاک چاہئے

سیر و سلوک جاں نہیں بے جذبۂ نہاں

اس راہ میں یہ توسن چالاک چاہئے

گزرے امید و بیم سے یہ حوصلہ کسے

رند خراب و عارف بے باک چاہئے

ہر چشمہ آئنہ ہے رخ آفتاب کا

ہاں سطح آب بے خس و خاشاک چاہئے

نشو و نمائے سبزہ و گل میں نہیں درنگ

ابر کرم کو تشنگیٔ خاک چاہئے

اصلاح حال عاشق دل خستہ ہے ضرور

معشوق جور پیشہ و سفاک چاہئے

جو عین نائے نوش ہو اس بادہ نوش کو

جام و سبو نہ خمکدہ و تاک چاہئے

صیاد کے اثر پہ رواں ہو تو صید ہے

وہ صید ہی نہیں جسے فتراک چاہئے

wan ziraki pasand na idrak chahiye

ijz-o-niyaz-e-dida-e-namnak chahiye

aina ban ke shahid-o-mashhud ek hai

is ru-e-pak ko nazar pak chahiye

sair-o-suluk-e-jan nahin be jazba-e-nihan

is rah mein ye tosun-e-chalak chahiye

guzre ummid-o-bim se ye hausla kise

rind-e-kharab-o-arif-e-be bak chahiye

har chashma aina hai rukh-e-aftab ka

han sath-e-ab be khas-o-khashak chahiye

nashw-o-nimae sabza-o-gul mein nahin dirang

abr-e-karam ko tishnagi-e-khak chahiye

islah hal-e-ashiq-e-dil khasta hai zarur

maashuq jaur-e-pesha-o-saffak chahiye

jo ain nae nosh ho is bada nosh ko

jam-o-subu na khamkada-o-tak chahiye

sayyad ke asar pe rawan ho to said hai

wo said hi nahin jise fitrak chahiye