نیا شوالا

سچ کہہ دوں اے برہمن! گر تو بُرا نہ مانے

تیرے صنم کدوں کے بُت ہو گئے پُرانے

اپنوں سے بَیر رکھنا تو نے بُتوں سے سیکھا

جنگ و جدَل سِکھایا واعظ کو بھی خدا نے

تنگ آ کے میں نے آخر دَیر و حرم کو چھوڑا

واعظ کا وعظ چھوڑا، چھوڑے ترے فسانے

پتھّر کی مُورتوں میں سمجھا ہے تُو خدا ہے

خاکِ وطن کا مجھ کو ہر ذرّہ دیوتا ہے

آ، غیریت کے پردے اک بار پھر اُٹھا دیں

بِچھڑوں کو پھر مِلا دیں نقشِ دُوئی مٹا دیں

سُونی پڑی ہوئی ہے مدّت سے دل کی بستی

آ، اک نیا شِوالا اس دیس میں بنا دیں

دنیا کے تیرتھوں سے اونچا ہو اپنا تیرتھ

دامانِ آسماں سے اس کا کلَس مِلا دیں

ہر صبح اُٹھ کے گائیں منتر وہ مٹیھے مٹیھے

سارے پُجاریوں کو مے پِیت کی پلا دیں

شکتی بھی، شانتی بھی بھگتوں کے گیت میں ہے

دھرتی کے باسیوں کی مُکتی پریت میں ہے

sach kah dun ai barahman! gar to bura na mane

tere sanam kadon ke but ho gae purane

apnon se bair rakhna tu ne buton se sikha

jang-o-jadal sikhaya waiz ko bhi khuda ne

tang a ke main ne akhir dair-o-haram ko chhora

waiz ka waaz chhora, chhore tire fasane

patthar ki muraton mein samjha hai tu khuda hai

khak-e-watan ka mujh ko har zarra dewta hai

a, ghairiyyat ke parde ik bar phir utha den

bichhrun ko phir mila den naqsh-e-dui mita den

suni pari hui hai muddat se dil ki basti

a, ik naya shiwala is des mein bana den

duniya ke tirathon se uncha ho apna tirath

daman-e-asman se us ka kalas mila den

har subh uth ke gaen mantar wo mittihai mittihai

sare pujariyon ko mai pit ki pila den

shakti bhi, shanti bhi bhagaton ke git mein hai

dharti ke basiyon ki mukti prit mein hai