نہ ہو پہلو میں جب دل زندگی کیا

نہ ہو پہلو میں جب دل زندگی کیا

ارے ہم کیا ہماری دل لگی کیا

خیال آبرو ہے نشہ میں بھی

ارے ہم کیا ہماری بے خودی کیا

مدد کچھ کر نہیں سکتے کسی کی

ارے ہم کیا ہماری دوستی کیا

کیا کرتے ہیں سجدے بے دلی سے

ارے ہم کیا ہماری بندگی کیا

تردد میں گزرتا ہے ہر اک دن

ارے ہم کیا ہماری زندگی کیا

سمجھتے ہیں عدو بھی دوست ہم کو

ارے ہم کیا ہماری دشمنی کیا

نصیحت بھی ہے دل آزار سیفیؔ

ارے ہم کیا ہماری شاعری کیا