نہ ہم دعا سے اب نہ وفا سے طلب کریں

نہ ہم دعا سے اب نہ وفا سے طلب کریں

عشق بتاں میں صبر خدا سے طلب کریں

دل خاک ہو گیا ہے تری رہ گزار میں

گر جا سکیں وہاں تو صبا سے طلب کریں

آخر خوشی تو عشق سے حاصل نہ کچھ ہوئی

ہم اب غم و الم ہی بلا سے طلب کریں

غمزے نے لے کے دل کو ادا کے کیا سپرد

غمزے سے دل کو لیں کہ ادا سے طلب کریں

دولت جو فقر کی ہے سو ہے اپنے دل کے پاس

وہ چیز یہ نہیں کہ گدا سے طلب کریں

دروازہ گو کھلا ہے اجابت کا پر حسنؔ

ہم کس کس آرزو کو خدا سے طلب کریں

na ham dua se ab na wafa se talab karen

ishq-e-butan mein sabr khuda se talab karen

dil khak ho gaya hai tiri rah guzar mein

gar ja saken wahan to saba se talab karen

akhir khushi to ishq se hasil na kuchh hui

ham ab gham-o-alam hi bala se talab karen

ghamze ne le ke dil ko ada ke kiya supurd

ghamze se dil ko len ke ada se talab karen

daulat jo faqr ki hai so hai apne dil ke pas

wo chiz ye nahin ke gada se talab karen

darwaza go khula hai ijabat ka par husn

ham kis kis arzu ko khuda se talab karen