نہ دِن کو چین نہ راتوں کو خواب آنکھوں میں

نہ دِن کو چین نہ راتوں کو خواب آنکھوں میں

بھر آ رہا ہے تیرے غم سے آب آنکھوں میں

جدھر وُہ دیکھے ادھر صف کی صف الٹ دے ہے

بھری ہے شوخ کہ ایسی شراب آنکھوں میں

تھما نہ اشک نہ نیند آئی نہ پلک جھپکی

بسا ہے جب سے وُہ خانہ خراب آنکھوں میں

تمہارے ہم تُو قدیمی غلام بندے ہیں

تمہیں نہ چاہئے ہم سے حجاب آنکھوں میں

قسم ہے چشم گلابی کی تری اے گُل رو

کے یاں کھنچے ہے پڑا نت گلاب آنکھوں میں

خُدا کی شان جنہیں بات بھی نہ آتی تھی

وُہ اب کرے ہیں سوال و جواب آنکھوں میں

شتابی آن کہ محبوبو پگڑیاں رنگ لو

نظیرؔ لایا ہے بھر کر شہاب آنکھوں میں