نہ راس آئی ہم کو جوانی ہماری

نہ راس آئی ہم کو جوانی ہماری

کٹے کیا برس زندگانی ہماری

عدو کی شب وصل سو بار صدقے

شب غم ہے کتنی سہانی ہماری

دغا دے رہے ہیں دم نزع تم کو

یہ ہے وقت رخصت نشانی ہماری

کیے میں نے شکوے تو وہ ہنس کے بولے

عدو پر بھی ہے مہربانی ہماری

انہیں نے تو دیوانہ ہم کو بنایا

وہی اب کریں پاسبانی ہماری

یہ ساقی نے ساغر میں کیا چیز دے دی

کہ توبہ ہوئی پانی پانی ہماری

ستاتے ہیں ہم بھی حسینوں کو کیا کیا

ستاتی ہے ہم کو جوانی ہماری

لگی تھی جو مے منہ سے بھر توبہ کیوں کی

ہوئی تلخ کیا زندگانی ہماری

کیا جھوٹ وعدہ کریں ہم جو تجھ سے

ترے کام آئے جوانی ہماری

بہت بے اثر تم اسے جانتے تھے

زبانوں پر اب ہے کہانی ہماری

قفس دست صیاد میں ہم قفس میں

یہ کام آئی ہے خوش بیانی ہماری

ریاضؔ آپ ہم قدرداں اپنے نکلے

کسی نے نہ کی قدردانی ہماری

na ras ai ham ko jawani hamari

kate kya baras zindagani hamari

adu ki shab-e-wasl sau bar sadqe

shab-e-gham hai kitni suhani hamari

dagha de rahe hain dam-e-nazaa tum ko

ye hai waqt-e-rukhsat nishani hamari

kiye main ne shikwe to wo hans ke bole

adu par bhi hai mehrbani hamari

unhen ne to diwana ham ko banaya

wahi ab karen pasbani hamari

ye saqi ne saghar mein kya chiz de di

ke tauba hui pani pani hamari

satate hain ham bhi hasinon ko kya kya

satati hai ham ko jawani hamari

lagi thi jo mai munh se bhar tauba kyun ki

hui talkh kya zindagani hamari

kiya jhut waada karen ham jo tujh se

tire kam ae jawani hamari

bahut be asar tum use jante the

zabanon par ab hai kahani hamari

qafas dast-e-sayyad mein ham qafas mein

ye kam ai hai khush bayani hamari

riyaz ap ham qadardan apne nikle

kisi ne na ki qadardani hamari