نہ بھول کر بھی تمنائے رنگ و بو کرتے

نہ بھول کر بھی تمنائے رنگ و بو کرتے

چمن کے پھول اگر تیری آرزو کرتے

جناب شیخ پہنچ جاتے حوض کوثر تک

اگر شراب سے مے خانے میں وضو کرتے

مسرت آہ تو بستی ہے کن ستاروں میں

زمیں پہ عمر ہوئی تیری جستجو کرتے

ایاغ بادہ میں آ کر وہ خود چھلک پڑتا

گر اس کے مست ذرا اور ہاؤ ہو کرتے

انہیں مفر نہ تھا اقرار عشق سے لیکن

حیا کو ضد تھی کہ وہ پاس آبرو کرتے

پکار اٹھتا وہ آ کر دلوں کی دھڑکن میں

ہم اپنے سینے میں گر اس کی جستجو کرتے

غم زمانہ نے مجبور کر دیا ورنہ

یہ آرزو تھی کہ بس تیری آرزو کرتے

گراں تھا ساقی دوراں پہ ایک ساغر بھی

تو کس امید پہ ہم خواہش سبو کرتے

جنون عشق کی تاثیر تو یہ تھی اخترؔ

کہ ہم نہیں وہ خود اظہار آرزو کرتے

na bhul kar bhi tamanna-e-rang-o-bu karte

chaman ke phul agar teri arzu karte

janab-e-shaikh pahunch jate hauz-e-kausar tak

agar sharab se mai khane mein wuzu karte

masarrat ah to basti hai kin sitaron mein

zamin pe umr hui teri justuju karte

ayagh-e-bada mein a kar wo khud chhalak parta

gar us ke mast zara aur hao ho karte

unhen mafar na tha iqrar-e-ishq se lekin

haya ko zid thi ke wo pas-e-abru karte

pukar uthta wo a kar dilon ki dharkan mein

ham apne sine mein gar us ki justuju karte

gham-e-zamana ne majbur kar diya warna

ye arzu thi ke bas teri arzu karte

giran tha saqi-e-dauran pe ek saghar bhi

to kis umid pe ham khwahish-e-subu karte

junun-e-ishq ki tasir to ye thi akhtar

ke ham nahin wo khud izhar-e-arzu karte