نہ دو دشنام ہم کو اتنی بد خوئی سے کیا حاصل

نہ دو دشنام ہم کو اتنی بد خوئی سے کیا حاصل

تمہیں دینا ہی ہوگا بوسہ خم روئی سے کیا حاصل

دل آزاری نے تیری کر دیا بالکل مجھے بیدل

نہ کر اب میری دل جوئی کہ دل جوئی سے کیا حاصل

نہ جب تک چاک ہو دل پھانس کب دل کی نکلتی ہے

جہاں ہو کام خنجر کا وہاں سوئی سے کیا حاصل

برائی یا بھلائی گو ہے اپنے واسطے لیکن

کسی کو کیوں کہیں ہم بد کہ بدگوئی سے کیا حاصل

نہ کر فکر خضاب اے شیخ تو پیری میں جانے دے

جواں ہونا نہیں ممکن سیہ روئی سے کیا حاصل

چڑھائے آستیں خنجر بکف وہ یوں جو پھرتا ہے

اسے کیا جانے ہے اس عربدہ جوئی سے کیا حاصل

عبث پنبہ نہ رکھ داغ دل سوزاں پہ تو میرے

کہ انگارے پہ ہوگا چارہ گر روئی سے کیا حاصل

شمیم زلف ہو اس کی تو ہو فرحت مرے دل کو

صبا ہووے گا مشک چیں کی خوشبوئی سے کیا حاصل

نہ ہووے جب تلک انساں کو دل سے میل یک جانب

ظفرؔ لوگوں کے دکھلانے کو یکسوئی سے کیا حاصل

na do dushnam ham ko itni bad khui se kya hasil

tumhen dena hi hoga bosa kham roi se kya hasil

dil azari ne teri kar diya bilkul mujhe bedil

na kar ab meri dil joi ke dil joi se kya hasil

na jab tak chak ho dil phans kab dil ki nikalti hai

jahan ho kam khanjar ka wahan soi se kya hasil

burai ya bhalai go hai apne waste lekin

kisi ko kyun kahin ham bad ke badgoi se kya hasil

na kar fikr-e-khizab ai shaikh to piri mein jane de

jawan hona nahin mumkin siyah roi se kya hasil

charhae astin khanjar bakaf wo yun jo phirta hai

use kya jane hai is arbada joi se kya hasil

abas pumba na rakh dagh-e-dil-e-sozan pe to mere

ke angare pe hoga chara gar roi se kya hasil

shamim-e-zulf ho us ki to ho farhat mire dil ko

saba howe ga mushk-e-chin ki khushbui se kya hasil

na howe jab talak insan ko dil se mel yak janib

zafar logon ke dikhlane ko yaksoi se kya hasil