نہ میں دل کو اب ہر مکاں بیچتا ہوں

نہ میں دل کو اب ہر مکاں بیچتا ہوں

کوئی خوب رو لے تو ہاں بیچتا ہوں

وہ مے جس کو سب بیچتے ہیں چھپا کر

میں اس مے کو یارو عیاں بیچتا ہوں

یہ دل جس کو کہتے ہیں عرش الٰہی

سو اس دل کو یارو میں یاں بیچتا ہوں

ذرا میری ہمت تو دیکھو عزیزو

کہاں کی ہے جنس اور کہاں بیچتا ہوں

لیے ہاتھ پر دل کو پھرتا ہوں یارو

کوئی مول لیوے تو ہاں بیچتا ہوں

وہ کہتا ہے جی کوئی بیچے تو ہم لیں

تو کہتا ہوں لو ہاں میاں بیچتا ہوں

میں ایک اپنے یوسف کی خاطر عزیزو

یہ ہستی کا سب کارواں بیچتا ہوں

جو پورا خریدار پاؤں تو یارو

میں یہ سب زمین و زماں بیچتا ہوں

زمیں آسماں عرش و کرسی بھی کیا ہے

کوئی لے تو میں لا مکاں بیچتا ہوں

جسے مول لینا ہو لے لے خوشی سے

میں اس وقت دونوں جہاں بیچتا ہوں

بکی جنس خالی دکاں رہ گئی ہے

سو اب اس دکاں کو بھی ہاں بیچتا ہوں

محبت کے بازار میں اے نظیرؔ اب

میں عاجز غریب اپنی جاں بیچتا ہوں

na main dil ko ab har makan bechta hun

koi khub ru le to han bechta hun

wo mai jis ko sab bechte hain chhupa kar

main is mai ko yaro ayan bechta hun

ye dil jis ko kahte hain arsh-e-ilahi

so is dil ko yaro mein yan bechta hun

zara meri himmat to dekho azizo

kahan ki hai jins aur kahan bechta hun

liye hath par dil ko phirta hun yaro

koi mol lewe to han bechta hun

wo kahta hai ji koi beche to ham len

tu kahta hun lo han miyan bechta hun

main ek apne yusuf ki khatir azizo

ye hasti ka sab karwan bechta hun

jo pura kharidar paon to yaro

main ye sab zamin-o-zaman bechta hun

zamin asman arsh-o-kursi bhi kya hai

koi le to main la makan bechta hun

jise mol lena ho le le khushi se

main is waqt donon jahan bechta hun

biki jins-e-khali dukan rah gai hai

so ab is dukan ko bhi han bechta hun

mohabbat ke bazar mein ai nazir ab

main ajiz gharib apni jan bechta hun