نانک

قوم نے پیغامِ گوتم کی ذرا پروا نہ کی

قدر پہچانی نہ اپنے گوہرِ یک دانہ کی

آہ! بد قسمت رہے آوازِ حق سے بے خبر

غافل اپنے پھل کی شیرینی سے ہوتا ہے شجر

آشکار اُس نے کِیا جو زندگی کا راز تھا

ہند کو لیکن خیالی فلسفے پر ناز تھا

شمعِ حق سے جو منّور ہو یہ وہ محفل نہ تھی

بارشِ رحمت ہوئی لیکن زمیں قابل نہ تھی

آہ! شُودر کے لیے ہندوستاں غم خانہ ہے

دردِ انسانی سے اس بستی کا دل بیگانہ ہے

برہَمن سرشار ہے اب تک مئے پندار میں

شمعِ گوتم جل رہی ہے محفلِ اغیار میں

بُت کدہ پھر بعد مُدّت کے مگر روشن ہُوا

نُورِ ابراہیمؑ سے آزر کا گھر روشن ہُوا

پھر اُٹھی آخر صدا توحید کی پنجاب سے

ہند کو اک مردِ کامل نے جگایا خواب سے

qaum ne paigham-e-gotam ki zara parwa na ki

qadar pahchani na apne gauhar-e-yak dana ki

ah! bad qismat rahe awaz-e-haq se be khabar

ghafil apne phal ki shirini se hota hai shajar

ashkar us ne kiya jo zindagi ka raz tha

hind ko lekin khayali falsafe par naz tha

sham-e-haq se jo munawwar ho ye wo mahfil na thi

barish-e-rahmat hui lekin zamin qabil na thi

ah! shudar ke liye hindostan gham khana hai

dard-e-insani se is basti ka dil begana hai

barahman sarshar hai ab tak mai-e-pindar mein

sham-e-gotam jal rahi hai mahfil-e-aghyar mein

but kada phir baad muddat ke magar raushan hua

nur-e-ibrahim se azar ka ghar raushan hua

phir uthi akhir sada tauhid ki panjab se

hind ko ik mard-e-kamil ne jagaya khwab se