نہ آیا ہمیں عشق کرنا نہ آیا

نہ آیا ہمیں عشق کرنا نہ آیا

مرے عمر بھر اور مرنا نہ آیا

یہ دل کی تڑپ کیا لحد کو ہلاتی

تمہیں قبر پر پاؤں دھرنا نہ آیا

نمکداں کئے تم نے گو لاکھ خالی

نمک تم کو زخموں میں بھرنا نہ آیا

یہی دن تھے سو سو طرح تم سنورتے

جوانی تو آئی سنورنا نہ آیا

دباتا تھا کافر حسینوں کا جوبن

مرے داغ دل کو ابھرنا نہ آیا

تری تیغ کیا کیا نہائی لہو میں

تری طرح لیکن نکھرنا نہ آیا

سنا کر وہ کہتے ہیں کس بھولے پن سے

ہمیں وعدہ کر کے مکرنا نہ آیا

بنے پنکھڑی نقش پا کب لحد پر

تجھے اے صبا گل کترنا نہ آیا

ریاضؔ اپنی قسمت کو اب کیا کہوں میں

بگڑنا تو آیا سنورنا نہ آیا

na aya hamen ishq karna na aya

mire umr bhar aur marna na aya

ye dil ki tarap kya lahad ko hilati

tumhen qabr par paon dharna na aya

namakdan kiye tum ne go lakh khali

namak tum ko zakhmon mein bharna na aya

yahi din the sau sau tarah tum sanwarte

jawani to ai sanwarna na aya

dabata tha kafir hasinon ka joban

mire dagh-e-dil ko ubharna na aya

tiri tegh kya kya nahai lahu mein

tiri tarah lekin nikharna na aya

suna kar wo kahte hain kis bhule pan se

hamen waada kar ke mukarna na aya

bane pankhuri naqsh-e-pa kab lahad par

tujhe ai saba gul katarna na aya

riyaz apni qismat ko ab kya kahon main

bigarna to aya sanwarna na aya