نگہ کا وار تھا دل پر پھڑکنے جان لگی

نگہ کا وار تھا دل پر پھڑکنے جان لگی

چلی تھی برچھی کسی پر کسی کے آن لگی

ترا زباں سے ملانا زباں جو یاد آیا

نہ ہائے ہائے میں تالو سے پھر زبان لگی

کسی کے دل کا سنو حال دل لگا کر تم

جو ہووے دل کو تمہارے بھی مہربان لگی

تو وہ ہے ماہ جبیں مثل دیدۂ انجم

رہے ہے تیری طرف چشم یک جہان لگی

خدا کرے کہے تجھ سے یہ کچھ خدا لگتی

کہ زلف اے بت بدکیشں تیرے کان لگی

اڑائی حرص نے آ کر جہاں میں سب کی خاک

نہیں ہے کس کو ہوا زیر آسمان لگی

کسی کی کاوش مژگاں سے آج ساری رات

نہیں پلک سے پلک میری ایک آن لگی

تباہ بحر جہاں میں تھی اپنی کشتی عمر

سو ٹوٹ پھوٹ کے بارے کنارے آن لگی

تمہارے ہاتھ سے سینے میں دل سے تابہ جگر

سنان و خنجر و پیکاں کی ہے دکان لگی

خدنگ یار مرے دل سے کس طرح نکلے

کہ اس کے ساتھ ہے اے ذوقؔ میری جان لگی

nigah ka war tha dil par pharakne jan lagi

chali thi barchhi kisi par kisi ke an lagi

tira zaban se milana zaban jo yad aya

na hae hae mein talu se phir zaban lagi

kisi ke dil ka suno hal-e-dil laga kar tum

jo howe dil ko tumhare bhi mehrban lagi

to wo hai mah-e-jabin misl-e-dida-e-anjum

rahe hai teri taraf chashm-e-yak jahan lagi

khuda kare kahe tujh se ye kuchh khuda lagti

ke zulf ai but badkeshan tere kan lagi

urai hirs ne a kar jahan mein sab ki khak

nahin hai kis ko hua zer-e-asman lagi

kisi ki kawish-e-mizhgan se aj sari rat

nahin palak se palak meri ek an lagi

tabah bahr jahan mein thi apni kashti-e-umr

so tut phut ke bare kinare an lagi

tumhare hath se sine mein dil se taba jigar

sinan-o-khanjar-o-paikan ki hai dukan lagi

khadang-e-yar mire dil se kis tarah nikle

ke us ke sath hai ai zauq meri jan lagi