ناصح مشفق یہ مشق تازہ فرمانے لگے

ناصح مشفق یہ مشق تازہ فرمانے لگے

دن تو تھا اب رات کو بھی آ کے سمجھانے لگے

حضرت واعظ کہیں دولت سرا کو جائیے

آتے ہی سامان محشر آپ دکھلانے لگے

آ گئے جب یاد کچھ اس ربط باہم کے مزے

دل بھر آیا دیدۂ تر اشک برسانے لگے

پھر سبو انڈلے بھرے شیشے ہوئے لبریز جام

لغزش پا اپنی اپنی مست دکھلانے لگے

باغباں ہشیار ہو مشتاق رخصت ہے بہار

رنگ بدلا گلستاں کا پھول مرجھانے لگے

جلوہ ہائے حسن چمکے اٹھ گئے منہ سے نقاب

طرۂ گیسو کے باہم سانپ لہرانے لگے

ہاتھ اٹھا اے چارہ گر درمان بے تاثیر سے

جائے اشک آنکھوں سے اب لخت جگر آنے لگے

خوب روئے دیکھ کر ہم زیور دیوانگی

جب احبا پاؤں میں زنجیر پہنانے لگے

بھٹیاں روشن ہوئیں چمکی دوکان مے فروش

رخصت توبہ ہوئی زہاد گھبرانے لگے

فصل گل آئی بڑھے جوش جنوں کے ولولے

دی صدا زنجیر نے پھر پاؤں کھجلانے لگے

مانع مطلب ہوئی وہ شرم باہم اے نسیمؔ

وہ رکے اپنی طرف ہم آپ شرمانے لگے

naseh-e-mushfiq ye mashq-e-taza farmane lage

din to tha ab rat ko bhi a ke samjhane lage

hazrat-e-waiz kahin daulat sara ko jaiye

ate hi saman-e-mahshar ap dikhlane lage

a gae jab yad kuchh is rabt-e-baham ke maze

dil bhar aya dida-e-tar ashk barasane lage

phir subu andale bhare shishe hue labrez jam

laghzish-e-pa apni apni mast dikhlane lage

baghban hushyar ho mushtaq rukhsat hai bahar

rang badla gulsitan ka phul murjhane lage

jalwa ha-e-husn chamke uth gae munh se naqab

turra-e-gesu ke baham sanp lahrane lage

hath utha ai chara gar diraman-e-be tasir se

jae ashk ankhon se ab lakht-e-jigar ane lage

khub roe dekh kar ham zewar-e-diwangi

jab ahba paon mein zanjir pahnane lage

bhattiyan raushan huin chamki dukan-e-mai farosh

rukhsat-e-tauba hui zohhad ghabrane lage

fasl-e-gul ai barhe josh-e-junun ke walwale

di sada zanjir ne phir paon khajlane lage

mane-e-matlab hui wo sharm baham ai nasim

wo ruke apni taraf ham ap sharmane lage