Arooz is now on the App Store, for iPhone and iPad. Download →

All poetry

نارسائی

Meeraji (1912–1949)

رات اندھیری بن ہے سونا کوئی نہیں ہے ساتھ

پون جھکولے پیڑ ہلائیں تھر تھر کانپیں پات

دل میں ڈر کا تیر چبھا ہے سینے پر ہے ہاتھ

رہ رہ کر سوچوں یوں کیسے پوری ہوگی رات

برکھا رت ہے اور جوانی لہروں کا طوفان

پیتم ہے نادان مرا دل رسموں سے انجان

کوئی نہیں جو بات سجھائے کیسے ہوں سامان

بھگون مجھ کو راہ دکھا دے مجھ کو دے دے گیان

چپو ٹوٹے ناؤ پرانی دور ہے کھیون ہار

بیری ہیں ندی کی موجیں اور پیتم اس پار

سن لے سن کے دکھ میں پکارے اک پریمی بچارا

کیسے جاؤں کیسے پہنچوں کیسے جتاؤں پیار

کیسے اپنے دل سے مٹاؤں برہ اگن کا روگ

کیسے سجھاؤں پریم پہیلی کیسے کروں سنجوگ

بات کی گھڑیاں بیت نہ جایں دور ہے اس کا دیس

دور دیس ہے پیتم کا اور میں بدلے ہوں بھیس