نئی تہذیب سے ساقی نے ایسی گرم جوشی کی

نئی تہذیب سے ساقی نے ایسی گرم جوشی کی

کہ آخر مسلموں میں روح پھونکی بادہ نوشی کی

تمہاری پالسی کا حال کچھ کھلتا نہیں صاحب

ہماری پالسی تو صاف ہے ایماں فروشی کی

چھپانے کے عوض چھپوا رہے ہیں خود وہ عیب اپنے

نصیحت کیا کروں میں قوم کو اب عیب پوشی کی

پہننے کو تو کپڑے ہی نہ تھے کیا بزم میں جاتے

خوشی گھر بیٹھے کر لی ہم نے جشن تاج پوشی کی

شکست رنگ مذہب کا اثر دیکھیں نئے مرشد

مسلمانوں میں کثرت ہو رہی ہے بادہ نوشی کی

رعایا کو مناسب ہے کہ باہم دوستی رکھیں

حماقت حاکموں سے ہے توقع گرم جوشی کی

ہمارے قافیے تو ہو گئے سب ختم اے اکبرؔ

لقب اپنا جو دے دیں مہربانی ہے یہ جوشی کی

nai tahzib se saqi ne aisi garm joshi ki

ke akhir muslimon mein ruh phunki bada noshi ki

tumhari palisi ka hal kuchh khulta nahin sahab

hamari palisi to saf hai iman faroshi ki

chhupane ke ewaz chhupwa rahe hain khud wo aib apne

nasihat kya karun main qaum ko ab aib poshi ki

pahanne ko to kapre hi na the kya bazm mein jate

khushi ghar baithe kar li ham ne jashn-e-taj poshi ki

shikast-e-rang mazhab ka asar dekhen nae murshid

musalmanon mein kasrat ho rahi hai bada noshi ki

riaya ko munasib hai ke baham dosti rakhen

himaqat hakimon se hai tawaqqo garm joshi ki

hamare qafiye to ho gae sab khatm ai akbar

laqab apna jo de den mehrbani hai ye joshi ki