میں جو حاصل ترے کوچے کی گدائی کرتا

میں جو حاصل ترے کوچے کی گدائی کرتا

بندگی کہتے ہیں کس شے کو خدائی کرتا

ذرے ذرے کو ترے کوچے میں تھا مجھ سے غبار

میں جو کرتا بھی تو کس کس سے صفائی کرتا

معتکف جو ترے کوچے کے تھے اٹھتے نہ کبھی

کعبہ خود آ کے اگر ناصیہ سائی کرتا

سوچ ناحق ہے اسیران قفس کے دل کو

کیا پڑی تھی جو کوئی فکر رہائی کرتا

کانپتے ہاتھوں سے کھلتا نہ قفس اے صیاد

کاش منظور بھی تو میری رہائی کرتا

شادؔ دشمن کی شکایت کا وظیفہ بیکار

کیا غرض تھی کہ مرے ساتھ بھلائی کرتا

main jo hasil tire kuche ki gadai karta

bandagi kahte hain kis shai ko khudai karta

zarre zarre ko tire kuche mein tha mujh se ghubar

main jo karta bhi to kis kis se safai karta

motakaf jo tire kuche ke the uthte na kabhi

kaaba khud a ke agar nasiya sai karta

soch nahaq hai asiran-e-qafas ke dil ko

kya pari thi jo koi fikr rihai karta

kanpte hathon se khulta na qafas ai sayyad

kash manzur bhi to meri rihai karta

shad dushman ki shikayat ka wazifa bekar

kya gharaz thi ke mire sath bhalai karta