میں آرزوئے جاں لکھوں یا جان آرزو!

میں آرزوئے جاں لکھوں یا جان آرزو!

تو ہی بتا دے ناز سے ایمان آرزو!

آنسو نکل رہے ہیں تصور میں بن کے پھول

شاداب ہو رہا ہے گلستان آرزو!

ایمان و جاں نثار تری اک نگاہ پر

تو جان آرزو ہے تو ایمان آرزو!

ہونے کو ہے طلوع صباح شب وصال

بجھنے کو ہے چراغ شبستان آرزو!

اک وہ کہ آرزؤں پہ جیتے ہیں عمر بھر

اک ہم کہ ہیں ابھی سے پشیمان آرزو!

آنکھوں سے جوئے خوں ہے رواں دل ہے داغ داغ

دیکھے کوئی بہار گلستان آرزو!

دل میں نشاط رفتہ کی دھندلی سی یاد ہے

یا شمع وصل ہے تہ دامان آرزو!

اخترؔ کو زندگی کا بھروسہ نہیں رہا

جب سے لٹا چکے سر و سامان آرزو!

main arzu-e-jan likhun ya jan-e-arzu!

tu hi bata de naz se iman-e-arzu!

ansu nikal rahe hain tasawwur mein ban ke phul

shadab ho raha hai gulistan-e-arzu!

iman-o-jan nisar tiri ik nigah par

tu jan-e-arzu hai to iman-e-arzu!

hone ko hai tulu-e-sabah-e-shab-e-wisal

bujhne ko hai charagh-e-shabistan-e-arzu!

ik wo ke arzuon pe jite hain umr bhar

ik ham ke hain abhi se pasheman-e-arzu!

ankhon se ju-e-khun hai rawan dil hai dagh dagh

dekhe koi bahar gulistan-e-arzu!

dil mein nishat-e-rafta ki dhundli si yad hai

ya sham-e-wasl hai tah-e-daman-e-arzu!

akhtar ko zindagi ka bharosa nahin raha

jab se luta chuke sar-o-saman-e-arzu!