میں اگر وہ ہوں جو ہونا چاہئے

میں اگر وہ ہوں جو ہونا چاہئے

میں ہی میں ہوں پھر مجھے کیا چاہئے

غرق خم ہونا میسر ہو تو بس

چاہئے ساغر نہ مینا چاہئے

منحصر مرنے پہ ہے فتح و شکست

کھیل مردانہ ہے کھیلا چاہئے

بے تکلف پھر تو کھیوا پار ہے

موجزن قطرہ میں دریا چاہئے

تیز غیروں پر نہ کر تیغ و تبر

آپ اپنے سے مبرا چاہئے

ہو دم عرض تجلی پاش پاش

سینہ مثل طور سینا چاہئے

حسن کی کیا ابتدا کیا انتہا

شیفتہ بھی بے سر و پا چاہئے

پارسا بن گر نہیں رندوں میں بار

کچھ تو بیکاری میں کرنا چاہئے

کفر ہے ساقی پہ خست کا گماں

تشنہ سرگرم تقاضا چاہئے

main agar wo hun jo hona chahiye

main hi mein hun phir mujhe kya chahiye

gharq-e-kham hona muyassar ho to bas

chahiye saghar na mina chahiye

munhasir marne pe hai fath-o-shikast

khel mardana hai khela chahiye

be takalluf phir to khewa par hai

maujzan qatra mein dariya chahiye

tez ghairon par na kar tegh-o-tabar

ap apne se mubbara chahiye

ho dam-e-arz-e-tajalli pash pash

sina misl-e-tur-e-sina chahiye

husn ki kya ibtida kya intiha

shefta bhi be sar-o-pa chahiye

parsa ban gar nahin rindon mein bar

kuchh to bekari mein karna chahiye

kufr hai saqi pe khissat ka guman

tishna sargarm-e-taqaza chahiye