میرے بعد

کوئی بھی آئے گا تربت پہ بھلا میرے بعد

خاک آ آ کے اڑائے گی صبا میرے بعد

جیتے جی قدر کسی نے بھی نہ جانی افسوس

یاد میں روئے گا پھر کون بھلا میرے بعد

سب یہ منہ دیکھے کی باتیں ہیں کہاں کی الفت

یاد کرنے کے نہیں اہل جفا میرے بعد

قوم نے قدر نہ کی رہ گئی حسرت دل میں

میری تربت سے یہ آئے گی صدا میرے بعد

فاتحہ پڑھنے کو آیا تو بہت رو رو کر

بخش دے اس کو خدا اس نے کہا میرے بعد

زندگی میں تو صلہ میں نے نہ پایا ہرگز

کام سب میرے ہوں مقبول خدا میرے بعد

یہ وصیت ہے کہ جس کو ہے محبت مجھ سے

پھول تربت پہ چڑھا جائے ذرا میرے بعد

پوچھتی تم سے حیا ہے یہ بتا دو مجھ کو

اب نہیں آتے ہو پھر آؤ گے کیا میرے بعد

koi bhi aega turbat pe bhala mere baad

khak a a ke uraegi saba mere baad

jite ji qadr kisi ne bhi na jani afsos

yad mein roega phir kaun bhala mere baad

sab ye munh dekhe ki baten hain kahan ki ulfat

yad karne ke nahin ahl-e-jafa mere baad

qaum ne qadr na ki rah gai hasrat dil mein

meri turbat se ye aegi sada mere baad

fatiha parhne ko aya to bahut ro ro kar

bakhsh de us ko khuda us ne kaha mere baad

zindagi mein to sila main ne na paya hargiz

kam sab mere hun maqbul khuda mere baad

ye wasyyat hai ke jis ko hai mohabbat mujh se

phul turbat pe charha jae zara mere baad

puchhti tum se haya hai ye bata do mujh ko

ab nahin ate ho phir aoge kya mere baad