میرے لیے ہزار کرے اہتمام حرص

میرے لیے ہزار کرے اہتمام حرص

میں وہ ہوں مجھ پہ ڈال سکے گی نہ دام حرص

ہے کچھ نہ کچھ ہر آدمی کو لا کلام حرص

لیکن نہ اس قدر کہ بنا لے غلام حرص

اے زلف پھیل پھیل کے رخسار کو نہ ڈھانک

کر نیم روز کی نہ شہ ملک شام حرص

واعظ شراب و حور کی الفت میں غرق ہے

ہے سر سے پاؤں تک یہ ستمگر تمام حرص

دل چھین عاشقوں کے مگر ہوشیار رہ

ایسا نہ ہو کہ دل کو بنا لے غلام حرص

ناقص رہیں گے سارے تلون سے کاروبار

کرنے نہ دے گی تجھ کو یہاں کوئی کام حرص

قبضہ اٹھائے گی نہ دل روزگار سے

جب تک نہ زندگی کا کرے اختتام حرص

مدت سے اشتیاق ہے بوس و کنار کا

گر حکم ہو شروع کرے اپنا کام حرص

پرویںؔ لگی ہوئی ہے خدا سے مجھے امید

دل کو مرے بنائے نہ اپنا غلام حرص

mere liye hazar kare ehtimam hirs

main wo hun mujh pe dal sakegi na dam hirs

hai kuchh na kuchh har admi ko la kalam hirs

lekin na is qadar ke bana le ghulam hirs

ai zulf phail phail ke rukhsar ko na dhank

kar nim roz ki na shah-e-mulk-e-sham hirs

waiz sharab-o-hur ki ulfat mein gharq hai

hai sar se paon tak ye sitamgar tamam hirs

dil chhin ashiqon ke magar hoshyar rah

aisa na ho ke dil ko bana le ghulam hirs

naqis rahenge sare talawwun se karobar

karne na degi tujh ko yahan koi kam hirs

qabza uthaegi na dil-e-rozgar se

jab tak na zindagi ka kare ikhtitam hirs

muddat se ishtiyaq hai bos-o-kanar ka

gar hukm ho shuru kare apna kam hirs

parwin lagi hui hai khuda se mujhe umid

dil ko mire banae na apna ghulam hirs