بڈھے بلوچ کی نصیحت بیٹے کو

ہو تیرے بیاباں کی ہوا تجھ کو گوارا

اس دشت سے بہتر ہے نہ دِلّی نہ بخارا

جس سمت میں چاہے صفَتِ سیلِ رواں چل

وادی یہ ہماری ہے، وہ صحرا بھی ہمارا

غیرت ہے بڑی چیز جہانِ تگ و دَو میں

پہناتی ہے درویش کو تاجِ سرِ دارا

حاصل کسی کامل سے یہ پوشیدہ ہُنَر کر

کہتے ہیں کہ شیشے کو بنا سکتے ہیں خارا

افراد کے ہاتھوں میں ہے اقوام کی تقدیر

ہر فرد ہے ملّت کے مقدّر کا ستارا

محروم رہا دولتِ دریا سے وہ غوّاص

کرتا نہیں جو صُحبتِ ساحل سے کنارا

دِیں ہاتھ سے دے کر اگر آزاد ہو ملّت

ہے ایسی تجارت میں مسلماں کا خسارا

دنیا کو ہے پھر معرکۂ رُوح و بدن پیش

تہذیب نے پھر اپنے درِندوں کو اُبھارا

اللہ کو پامردیِ مومن پہ بھروسا

اِبلیس کو یورپ کی مشینوں کا سہارا

تقدیرِ اُمَم کیا ہے، کوئی کہہ نہیں سکتا

مومن کی فراست ہو تو کافی ہے اشارا

اخلاصِ عمل مانگ نیا گانِ کُہن سے

’شاہاں چہ عجب گر بنوازند گدا را!‘

ho tere bayaban ki hawa tujh ko gawara

is dasht se behtar hai na dilli na bukhara

jis samt mein chahe sifat-e-sail-e-rawan chal

wadi ye hamari hai, wo sahra bhi hamara

ghairat hai bari chiz jahan-e-tag-o-dau mein

pahnati hai darwesh ko taj-e-sar-e-dara

hasil kisi kamil se ye poshida hunar kar

kahte hain ke shishe ko bana sakte hain khara

afrad ke hathon mein hai aqwam ki taqdir

har fard hai millat ke muqaddar ka sitara

mahrum raha daulat-e-dariya se wo ghawwas

karta nahin jo sohbat-e-sahil se kinara

din hath se de kar agar azad ho millat

hai aisi tijarat mein musalman ka khasara

duniya ko hai phir marka-e-ruh-o-badan pesh

tahzib ne phir apne darindon ko ubhara

allah ko pamardi-e-momin pe bharosa

iblis ko yorap ki mashinon ka sahara

taqdir-e-umam kya hai, koi kah nahin sakta

momin ki firasat ho to kafi hai ishara

ikhlas-e-amal mang naya gan-e-kuhan se

'shahan cha ajab gar banwazand gada ra!'