ممنوں ہی رہا اس بت کافر کی جفا کا

ممنوں ہی رہا اس بت کافر کی جفا کا

شکوہ نہ کیا دل نے کبھو شکر خدا کا

اعضا کے تناسب کا نہ وارفتہ ہو اتنا

آنکھیں ہیں تو رہ حیرتی انداز و ادا کا

ہر دم ہے ہدف ناوک بیداد کا تیری

پتھر کا کلیجا ہے مگر اہل وفا کا

تابوت ہی دیکھا نہ مرا آنکھ اٹھا کر

کیا شرم ہے کشتہ ہوں میں اس شرم و حیا کا

پاس اس کے بنا دیجو مری آنکھ بھی نقاش

گر کھینچے ہے تو نقش رخ اس حور لقا کا

کس طرح میں اب سر پہ بھلا خاک نہ ڈالوں

دیکھوں ہوں نشاں در پہ تری صد کف پا کا

کس بیکسی کی مرگ ہے راسخؔ کا بھی مرنا

نعش اس کی پہ کوئی نہ ہوا محو عزا کا

mamnun hi raha us but-e-kafir ki jafa ka

shikwa na kiya dil ne kabhu shukr-e-khuda ka

aaza ke tanasub ka na warafta ho itna

ankhen hain to rah hairati andaz-o-ada ka

har dam hai hadaf nawak-e-bedad ka teri

patthar ka kaleja hai magar ahl-e-wafa ka

tabut hi dekha na mira ankh utha kar

kya sharm hai kushta hun main is sharm-o-haya ka

pas us ke bina dijo miri ankh bhi naqqash

gar khinche hai to naqsh rukh is hur liqa ka

kis tarah main ab sar pe bhala khak na dalun

dekhun hun nishan dar pe tiri sad kaf-e-pa ka

kis bekasi ki marg hai rasikh ka bhi marna

naash us ki pe koi na hua mahw-e-aza ka