بندگی ہم نے تو جی سے اپنی ٹھانی آپ کی

بندگی ہم نے تو جی سے اپنی ٹھانی آپ کی

بندہ پرور خیر آگے قدر دانی آپ کی

تھی جو وہ لاہی کی ٹوپی زعفرانی آپ کی

سو ہمارے پاس ہے اب تک نشانی آپ کی

دم بدم کہہ بیٹھنا بس جاؤ اپنی ان کے پاس

کیوں نہیں جاتی وہ اب تک بد گمانی آپ کی

کیا کہوں مارے خوشی کے حال میرا کیا ہوا

آمد آمد جو ہوئی کل ناگہانی آپ کی

ہے کسی سے آج وعدہ کچھ اجی خالی نہیں

یہ دھڑے مسی کی ہونٹوں پر جمانی آپ کی

ہم نے سو راتیں جگائیں تب ہوا یہ اتفاق

سو اسی دن کو دھری تھی نیند آنی آپ کی

میرے حق میں اب جو یہ ارشاد فرمایا کہ ہے

خوب یاں منقوش خاطر جانفشانی آپ کی

لیک میں اوڑھوں بچھاؤں یا لپیٹوں کیا کروں

روکھی پھیکی ایسی سوکھی مہربانی آپ کی

کیوں نہ عشق اللہ بولوں حضرت دل آپ کو

پیشواؤں نے بھی اپنی آن مانی آپ کی

دید کر ڈالا بس ان سے عالم لاہوت ثبت

جس نے لگدی بنک کی صافی میں چھانی آپ کی

اپنی آنکھوں میں پڑی پھرتی ہے اب تک روز و شب

عرش پر داتا وہی صورت دکھانی آپ کی

اے جنوں استاد بس خم ٹھونک کر آ جائیے

ہاں خلیفہ ہم بھی دیکھیں پہلوانی آپ کی

صدقہ صدقہ کیوں نہ ہو جاؤں بھلا غش کھا کے میں

دیکھ گدرائی ہوئی اٹھتی جوانی آپ کی

سبزہ آغازی سو یہ کچھ تسپہ آفت سادگی

قہر پھر اس بات پر گردن ہلانی آپ کی

اپنی آنکھوں میں تراوٹ آ گئی یک بارگی

دیکھ کر یہ لہلہے پوشاک دھانی آپ کی

کیوں نہ لڑکی سب کہیں حوا تمہیں اے شیخ جیو

ہے جھموخی کی سی صورت یہ ڈرانی آپ کی

گول پگڑی نیلی لنگی مونچھ منڈی تکیہ ریش

پھر وہ رومال اور وہ آخ تھو ناسدانی آپ کی

دو گلابی لا کے ساقی نے کہا انشاؔ کو رات

زعفرانی میرا حصہ ارغوانی آپ کی

bandagi ham ne to ji se apni thani ap ki

banda parwar khair age qadr dani ap ki

thi jo wo lahi ki topi zafrani ap ki

so hamare pas hai ab tak nishani ap ki

dam badam kah baithna bas jao apni un ke pas

kyun nahin jati wo ab tak bad gumani ap ki

kya kahun mare khushi ke hal mera kya hua

amad amad jo hui kal nagahani ap ki

hai kisi se aj waada kuchh aji khali nahin

ye dharre missi ki honton par jamani ap ki

ham ne so raten jagaen tab hua ye ittifaq

so usi din ko dhari thi nind ani ap ki

mere haq mein ab jo ye irshad farmaya ke hai

khub yan manqush-e-khatir janfishani ap ki

lek mein orhun bichhaun ya lapetun kya karun

rukhi phiki aisi sukhi mehrbani ap ki

kyun na ishq allah bolun hazrat-e-dil ap ko

peshwaon ne bhi apni an mani ap ki

did kar dala bas un se alam-e-lahut sabt

jis ne lagdi banak ki safi mein chhani ap ki

apni ankhon mein pari phirti hai ab tak roz-o-shab

arsh par data wahi surat dikhani ap ki

ai junun ustad bas kham thonk kar a jaiye

han khalifa ham bhi dekhen pahlwani ap ki

sadqa sadqa kyun na ho jaun bhala ghash kha ke main

dekh gidrai hui uthti jawani ap ki

sabza aghazi so ye kuchh tispe afat sadgi

qahr phir is bat par gardan hilani ap ki

apni ankhon mein tarot a gai yak bargi

dekh kar ye lahlihe poshak dhani ap ki

kyun na larki sab kahin hawwa tumhen ai shaikh jiyo

hai jhimokhi ki si surat ye darani ap ki

gol pagri nili lungi munchh mandi takiya rish

phir wo rumal aur wo akh thu nasdani ap ki

do gulabi la ke saqi ne kaha insha ko rat

zafrani mera hissa arghawani ap ki