ملمع کی انگوٹھی

چاندی کی انگوٹھی پہ جو سونے کا چڑھا جھول

اوچھی تھی لگی بولنے اترا کے بڑا بول

اے دیکھنے والو تمہی انصاف سے کہنا

چاندی کی انگوٹھی بھی ہے کچھ گہنوں میں گہنا

وہ اور ہے میں اور یہ ذلت نہ سہوں گی

میں قوم کی اونچی ہوں بڑا میرا گھرانا

وہ ذات کی گھٹیا ہے نہیں اس کا ٹھکانا

میری سی کہاں چاشنی میرا سا کہاں رنگ

وہ مول میں اور تول میں میرے نہیں پاسنگ

میری سی چمک اس میں نہ میری سی دمک ہے

چاندی ہے کہ ہے رانگ مجھے اس میں بھی شک ہے

یہ سنتے ہی چاندی کی انگوٹھی بھی گئی جل

اللہ رے ملمع کی انگوٹھی تیرے چھل بل

سونے کی ملمع پہ نہ اترا میری پیاری

دو دن میں بھڑک اس کی اتر جائے گی ساری

کچھ دیر حقیقت کو چھپایا بھی تو پھر کیا

جھوٹوں نے جو سچوں کو چڑھایا بھی تو پھر کیا

مت بھول کبھی اصل تو اپنی اری احمق

جب تاؤ دیا جائے گا ہو جائے گا منہ فق

سچے کی تو عزت ہی بڑھے گی جو کریں جانچ

مشہور مثل ہے کہ نہیں سانچ کو کچھ آنچ

کھونے کو کھرا بن کے نکھرنا نہیں اچھا

چھوٹے کو بڑا بن کے ابھرنا نہیں اچھا

chandi ki anguthi pe jo sone ka charha jhul

ochhi thi lagi bolne utra ke bara bol

ai dekhne walo tumhi insaf se kahna

chandi ki anguthi bhi hai kuchh gahnon mein gahna

wo aur hai main aur ye zillat na sahungi

main qaum ki unchi hun bara mera gharana

wo zat ki ghatiya hai nahin us ka thikana

meri si kahan chashni mera sa kahan rang

wo mol mein aur tol mein mere nahin pasang

meri si chamak is mein na meri si damak hai

chandi hai ke hai rang mujhe is mein bhi shak hai

ye sunte hi chandi ki anguthi bhi gai jal

allah re mulammaa ki anguthi tere chhal bal

sone ki mulammaa pe na utra meri pyari

do din mein bharak us ki utar jaegi sari

kuchh der haqiqat ko chhupaya bhi to phir kya

jhuton ne jo sachchon ko charhaya bhi to phir kya

mat bhul kabhi asl to apni ari ahmaq

jab tao diya jaega ho jaega munh faq

sachche ki to izzat hi barhegi jo karen janch

mashhur misl hai ke nahin sanch ko kuchh anch

khone ko khara ban ke nikharna nahin achchha

chhote ko bara ban ke ubharna nahin achchha