بزم سے آخر شب ہے سفر جام شراب

بزم سے آخر شب ہے سفر جام شراب

شام غربت ہوئی ساقی سحر‌ جام شراب

مست و سرشار کو سرشار سنبھالے کیا خاک

نہ تھمی دست سبو سے کمر جام شراب

کثرت مجمع اغیار سے محروم رہا

نہ ہوا بزم میں مجھ تک گزر جام شراب

محتسب دے گا جواب اپنے ستم کا تو کیا

کل جو کوثر پہ ہوا داد گر جام شراب

یہ بھی اے محتسب اس لال پری کا ہے اثر

اڑ کے پہنچی ہے جو تجھ تک خبر جام شراب

بزم دشمن میں رہے آپ تو صوفی بن کر

سرخ آنکھوں میں کہاں ہے اثر جام شراب

نہیں معلوم کہ اے داغؔ ہے تو کس دھن میں

نہ تلاش بت مہ وش نہ سر جام شراب

bazm se akhir-e-shab hai safar jam-e-sharab

sham-e-ghurbat hui saqi sahar jam-e-sharab

mast-o-sarshar ko sarshar sambhale kya khak

na thami dast-e-subu se kamar jam-e-sharab

kasrat majma-e-aghyar se mahrum raha

na hua bazm mein mujh tak guzar jam-e-sharab

mohtasib dega jawab apne sitam ka to kya

kal jo kausar pe hua dad gar jam-e-sharab

ye bhi ai mohtasib is lal pari ka hai asar

ur ke pahunchi hai jo tujh tak khabar jam-e-sharab

bazm-e-dushman mein rahe ap to sufi ban kar

surkh ankhon mein kahan hai asar jam-e-sharab

nahin maalum ke ai dagh hai to kis dhun mein

na talash-e-but-e-mah wash na sar jam-e-sharab