مدت ہوئی ہے مدح حسیناں کئے ہوئے

مدت ہوئی ہے مدح حسیناں کئے ہوئے

نور سخن سے دل کو چراغاں کئے ہوئے

عرصہ ہوا ہے وصف بہار جمال سے

روئے ورق کو رشک گلستاں کئے ہوئے

برسوں ہوئے ہیں تذکرۂ سوز عشق سے

بزم سخنوری کو درخشاں کئے ہوئے

آتا ہے کس شکوہ سے وہ رشک آفتاب

ظلمت کدے دلوں کے چراغاں کئے ہوئے

جاتا ہوں کوئے یار کو دیکھ اے گھٹا مجھے

برپا ہجوم اشک سے طوفاں کئے ہوئے

بیٹھے ہیں ہم تصور گیسوئے یار میں

اس زندگی کو خواب پریشاں کئے ہوئے

خوں کر کے لے چلا ہوں دل و جاں کو اپنے ساتھ

دیدار روئے یار کا ساماں کئے ہوئے

مر مٹئے اس ادا پہ کہ کچھ لوگ جل بجھے

سینے میں سوز عشق کو پنہاں کئے ہوئے

وہ نو بہار حسن بھی اس راہ سے گیا

ہر نقش پا کو روضۂ رضواں کئے ہوئے

muddat hui hai madh hasinan kiye hue

nur-e-sukhan se dil ko charaghan kiye hue

arsa hua hai wasf-e-bahar-e-jamal se

ru-e-waraq ko rashk-e-gulistan kiye hue

barson hue hain tazkira-e-soz-e-ishq se

bazm-e-sukhanwari ko darakhshan kiye hue

ata hai kis shikwa se wo rashk-e-aftab

zulmat kade dilon ke charaghan kiye hue

jata hun ku-e-yar ko dekh ai ghata mujhe

barpa hujum-e-ashk se tufan kiye hue

baithe hain ham tasawwur-e-gesu-e-yar mein

is zindagi ko khwab-e-pareshan kiye hue

khun kar ke le chala hun dil-o-jan ko apne sath

didar ru-e-yar ka saman kiye hue

mar mitiye is ada pe ke kuchh log jal bujhe

sine mein soz-e-ishq ko pinhan kiye hue

wo nau bahar-e-husn bhi is rah se gaya

har naqsh-e-pa ko rauza-e-rizwan kiye hue