مر کر ارے واعظ کوئی زندہ نہیں ہوتا

مر کر ارے واعظ کوئی زندہ نہیں ہوتا

وہ حشر مزے کا ہے جو برپا نہیں ہوتا

بت توڑنے سے بت کدہ کعبہ نہیں ہوتا

پہلے کبھی ہوتا ہو اب ایسا نہیں ہوتا

سب حشر میں ہیں آج ہمیں زیر لحد ہیں

کیا جانئے کیوں حشر ہمارا نہیں ہوتا

ہوتی ہے جو شیشے میں تو ہوتی نہیں کچھ فکر

تھوڑی سی بھی ہو تو غم فردا نہیں ہوتا

ٹھکراتے نہیں پائے حنائی سے وہ سر کو

روشن کبھی قسمت کا ستارا نہیں ہوتا

سن لیتے ہیں چپکے سے موذن کی ہم اے شیخ

جب ہاتھ میں ناقوس کلیسا نہیں ہوتا

آنے کو تو آتی ہیں جنوں خیز بہاریں

کیا جانئے اب کیوں ہمیں سودا نہیں ہوتا

میخانے میں کیوں یاد خدا ہوتی ہے اکثر

مسجد میں تو ذکر مے و مینا نہیں ہوتا

اللہ دکھائے نہ برا وقت کسی کو

کوئی بھی زمانے میں کسی کا نہیں ہوتا

ٹھکراتے ہوئے ڈرتے ہو کیوں میری لحد کو

ٹھوکر سے تمہاری کوئی زندہ نہیں ہوتا

آقا سے ریاضؔ آپ تو کہتے نہیں کچھ بھی

اوروں سے گلہ کام ہمارا نہیں ہوتا

mar kar are waiz koi zinda nahin hota

wo hashr maze ka hai jo barpa nahin hota

but torne se but kada kaaba nahin hota

pahle kabhi hota ho ab aisa nahin hota

sab hashr mein hain aj hamen zer-e-lahad hain

kya janiye kyun hashr hamara nahin hota

hoti hai jo shishe mein to hoti nahin kuchh fikr

thori si bhi ho to gham-e-farda nahin hota

thukrate nahin pae hinai se wo sar ko

raushan kabhi qismat ka sitara nahin hota

sun lete hain chupke se muazzin ki ham ai shaikh

jab hath mein naqus-e-kalisa nahin hota

ane ko to ati hain junun khez baharen

kya janiye ab kyun hamen sauda nahin hota

maikhane mein kyun yad-e-khuda hoti hai aksar

masjid mein to zikr-e-mai-o-mina nahin hota

allah dikhae na bura waqt kisi ko

koi bhi zamane mein kisi ka nahin hota

thukrate hue darte ho kyun meri lahad ko

thokar se tumhari koi zinda nahin hota

aqa se riyaz ap to kahte nahin kuchh bhi

auron se gila kam hamara nahin hota