مر گئے اے واہ ان کی ناز برداری میں ہم

مر گئے اے واہ ان کی ناز برداری میں ہم

دل کے ہاتھوں سے پڑے کیسی گرفتاری میں ہم

سب پہ روشن ہے ہماری سوزش دل بزم میں

شمع ساں جلتے ہیں اپنی گرم بازاری میں ہم

یاد میں ہے تیرے دم کی آمد و شد پر خیال

بے خبر سب سے ہیں اس دم کی خبرداری میں ہم

جب ہنسایا گردش گردوں نے ہم کو شکل گل

مثل شبنم ہیں ہمیشہ گریہ و زاری میں ہم

چشم و دل بینا ہے اپنے روز و شب اے مردماں

گرچہ سوتے ہیں بظاہر پر ہیں بیداری میں ہم

دوش پر رخت سفر باندھے ہے کیا غنچہ صبا

دیکھتے ہیں سب کو یاں جیسے کہ تیاری میں ہم

کب تلک بے دید سے یا رب رکھیں چشم وفا

لگ رہے ہیں آج کل تو دل کی غم خواری میں ہم

دیکھ کر آئینہ کیا کہتا ہے یارو اب وہ شوخ

ماہ سے صد چند بہتر ہیں اداداری میں ہم

اے ظفرؔ لکھ تو غزل بحر و قوافی پھیر کر

خامۂ در ریز سے ہیں اب گہر باری میں ہم

mar gae ai wah un ki naz bardari mein ham

dil ke hathon se pare kaisi giraftari mein ham

sab pe raushan hai hamari sozish-e-dil bazm mein

shama san jalte hain apni garm-e-bazari mein ham

yad mein hai tere dam ki amad-o-shud par khayal

be khabar sab se hain is dam ki khabardari mein ham

jab hansaya gardish-e-gardun ne ham ko shakl-e-gul

misl-e-shabnam hain hamesha girya-o-zari mein ham

chashm-o-dil bina hai apne roz-o-shab ai marduman

garche sote hain bazahir par hain bedari mein ham

dosh par rakht-e-safar bandhe hai kya ghuncha saba

dekhte hain sab ko yan jaise ke tayyari mein ham

kab talak be did se ya rab rakhen chashm-e-wafa

lag rahe hain aj kal to dil ki gham khwari mein ham

dekh kar aina kya kahta hai yaro ab wo shokh

mah se sad chand behtar hain adadari mein ham

ai zafar likh to ghazal bahr-o-quufi pher kar

khama-e-dar rez se hain ab guhar bari mein ham