محبت (علی منظور حیدرآبادی)

محبت خدا کی حقیقت کا نور

محبت کسی کا پیام ظہور

محبت کے پیغامبر انبیا

محبت کے زیر اثر اولیا

محبت نقوش بیاض وجود

تر و تازہ اس سے ریاض شہود

محبت نہیں تو نہیں زندگی

محبت سے ہے دل نشیں زندگی

محبت سے ہر ذرہ پیوستہ ہے

طرب زا محبت کا گلدستہ ہے

نشاط محبت رفیق حیات

کئے اس نے حل زندگی کے نکات

محبت سے ہر اک حقیقت عیاں

محبت سے ماں کی فضیلت عیاں

محبت سے شان پدر سر بلند

محبت سے وصف پسر ارجمند

محبت سے مضبوط اجزائے قوم

محبت سے مربوط آرائے قوم

محبت سے قائم نظام حیات

تغیر میں بھی ان کا نور ثبات

محبت نہیں ہے تو کچھ بھی نہیں

محبت ہی ہے اصل دنیا و دیں

mohabbat khuda ki haqiqat ka nur

mohabbat kisi ka payam-e-zuhur

mohabbat ke paighambar ambiya

mohabbat ke zer-e-asar auliya

mohabbat nuqush-e-bayaz-e-wajud

tar-o-taza us se riyaz-e-shuhud

mohabbat nahin to nahin zindagi

mohabbat se hai dil nashin zindagi

mohabbat se har zarra paiwasta hai

tarab za mohabbat ka guldasta hai

nishat-e-mohabbat rafiq-e-hayat

kiye us ne hal zindagi ke nikat

mohabbat se har ik haqiqat ayan

mohabbat se man ki fazilat ayan

mohabbat se shan-e-pidar sar buland

mohabbat se wasf-e-pisar arjmand

mohabbat se mazbut ajza-e-qaum

mohabbat se marbut ara-e-qaum

mohabbat se qaim nizam-e-hayat

taghayyur mein bhi un ka nur-e-sabat

mohabbat nahin hai to kuchh bhi nahin

mohabbat hi hai asl-e-duniya-o-din