یہ چڑیاں چہچہاتی ہیں تو ان کو چہچہانے دو
محمد صادق ضیایہ چڑیاں چہچہاتی ہیں تو ان کو چہچہانے دو
پرندوں کو درختوں پر خوشی کے گیت گانے دو
زمیں پر ابر کی ہر بوند کو نغمے سنانے دو
فلک پر لیلیٔ قوس قزح کو مسکرانے دو
مرا دل سرد ہے مجھ کو یوں ہی بے ہوش رہنے دو
مجھے خاموش رہنے دو
فضائے دہر لبریز مسرت ہے تو مجھ کو کیا
اگر دنیا خراب عیش و عشرت ہے تو مجھ کو کیا
جو معمور صدا ساز محبت ہے تو مجھ کو کیا
جہاں کو میرے نغموں کی ضرورت ہے تو مجھ کو کیا
مجھے اپنے خیالوں ہی سے ہم آغوش رہنے دو
مجھے خاموش رہنے دو
مجھے فرصت نہیں ہے فرط غم سے سر اٹھانے کی
گراں ہے میرے دل پر شورش و کاوش زمانے کی
ابھی کڑیاں مرتب ہو رہی ہیں اک فسانے کی
ابھی ساعت کہاں ہے داستان دل سنانے کی
کسی کی یاد میں مجھ کو تصور کوش رہنے دو
مجھے خاموش رہنے دو
جو میں بولا تو سب کو اپنے اشکوں میں بھگو دوں گا
دل انساں میں غم کے سینکڑوں کانٹے چبھو دوں گا
جو میں بولا تو گویائی زمانے بھر کی کھو دوں گا
جو میں بولا تو دنیا کو خموشی میں ڈبو دوں گا
یہی بہتر ہے خلوت میں مجھے خاموش رہنے دو
مجھے خاموش رہنے دو
ye chiriyan chahchahati hain to un ko chahchahane do
parindon ko darakhton par khushi ke git gane do
zamin par abr ki har bund ko naghme sunane do
falak par laila-e-qaus-e-quzah ko muskurane do
mira dil sard hai mujh ko yun hi be hosh rahne do
mujhe khamosh rahne do
faza-e-dahr labrez masarrat hai to mujh ko kya
agar duniya kharab-e-aish-o-ishrat hai to mujh ko kya
jo maamur sada saz-e-mohabbat hai to mujh ko kya
jahan ko mere naghmon ki zarurat hai to mujh ko kya
mujhe apne khayalon hi se ham aghosh rahne do
mujhe khamosh rahne do
mujhe fursat nahin hai fart-e-gham se sar uthane ki
giran hai mere dil par shorish-o-kawish zamane ki
abhi kariyan murattib ho rahi hain ik fasane ki
abhi saat kahan hai dastan-e-dil sunane ki
kisi ki yad mein mujh ko tasawwur kosh rahne do
mujhe khamosh rahne do
jo main bola to sab ko apne ashkon mein bhigo dunga
dil-e-insan mein gham ke sainkron kante chubho dunga
jo main bola to goyai zamane bhar ki kho dunga
jo main bola to duniya ko khamoshi mein dubo dunga
yahi behtar hai khalwat mein mujhe khamosh rahne do
mujhe khamosh rahne do