محفل میں ہم تھے اس طرف وہ شوخ چنچل اس طرف — نظیر اکبر آبادی (Nazeer Akbarabadi)

محفل میں ہم تھے اس طرف وہ شوخ چنچل اس طرف

تھی سادہ لوحی اس طرف مکر و فسوں چھل اس طرف

بیٹھے ہم اپنے دھیان میں بیٹھا وہ اپنی آن میں

فکر نظارہ اس طرف مکھڑے پر آنچل اس طرف

کیا کیا دکھاتی ہے الم کیا کیا رکھے ہے پیچ و خم

آہوں کی شورش اس طرف زلف مسلسل اس طرف

ہم دے کے دل ہیں رنج کش وہ لے کے دل ہے جی میں خوش

بے تابیٔ جاں اس طرف راحت خوشی کل اس طرف

آج اس سے ملنے کو نظیرؔ احوال ہے دل کا عجب

ہم کھینچتے ہیں اس طرف کہتا ہے وہ چل اس طرف