محفل میں غیر ہی کو نہ ہر بار دیکھنا

محفل میں غیر ہی کو نہ ہر بار دیکھنا

میری طرف بھی بھول کے سرکار دیکھنا

آغاز سبزہ سے ہے جو رخسار پر غبار

اگلے برس اسے خط گل زار دیکھنا

جب صرف گفتگو ہوں تو دیکھے انہیں کوئی

منظور ہو جو ابر گہربار دیکھنا

میں نے کہا کہ ہجر میں کچھ مشغلہ نہیں

بولے کہ رات دن در و دیوار دیکھنا

کہتا ہوں جب میں ان سے بناؤ سنگھار کو

کہتے ہیں کوئی اور طرحدار دیکھنا

میں جان بھی دریغ کروں تو گناہ گار

میرے سوا نہ اور خریدار دیکھنا

وہ مجھ سے پوچھتے ہیں کہ کچھ عیب تو نہیں

رفتار دیکھنا مری گفتار دیکھنا

شیخ زماں قدیم روش کے بزرگ ہیں

کتنا بڑا ہے گنبد دستار دیکھنا

وہ بار بار دیکھتے ہیں آئنہ میں منہ

اللہ ان کا روئے پر انوار دیکھنا

چلتے ہیں کوئے یار میں ہے وقت امتحاں

ہمت نہ ہارنا دل بیمار دیکھنا

ہوشیار پھونک پھونک کے رکھنا یہاں قدم

پرویںؔ ذرا زمانہ کی رفتار دیکھنا

mahfil mein ghair hi ko na har bar dekhna

meri taraf bhi bhul ke sarkar dekhna

aghaz-e-sabza se hai jo rukhsar par ghubar

agle baras use khat-e-gul zar dekhna

jab sirf-e-guftugu hun to dekhe unhen koi

manzur ho jo abr-e-guharbar dekhna

main ne kaha ke hijr mein kuchh mashghala nahin

bole ke rat din dar-o-diwar dekhna

kahta hun jab main un se banao singhar ko

kahte hain koi aur tarhdar dekhna

main jan bhi daregh karun to gunah gar

mere siwa na aur kharidar dekhna

wo mujh se puchhte hain ke kuchh aib to nahin

raftar dekhna miri guftar dekhna

shaikh-e-zaman qadim rawish ke buzurg hain

kitna bara hai gumbad-e-dastar dekhna

wo bar bar dekhte hain aina mein munh

allah un ka roe par anwar dekhna

chalte hain ku-e-yar mein hai waqt-e-imtihan

himmat na harna dil-e-bimar dekhna

hoshyar phunk phunk ke rakhna yahan qadam

parwin zara zamana ki raftar dekhna