محبت کی دنیا میں مشہور کر دوں

محبت کی دنیا میں مشہور کر دوں

مری سادہ دل تجھ کو مغرور کر دوں

ترے دل کو ملنے کی خود آرزو ہو

تجھے اس قدر غم سے رنجور کر دوں

مجھے زندگی دور رکھتی ہے تجھ سے

جو تو پاس ہو تو اسے دور کر دوں

محبت کے اقرار سے شرم کب تک

کبھی سامنا ہو تو مجبور کر دوں

مرے دل میں ہے شعلۂ حسن رقصاں

میں چاہوں تو ہر ذرے کو طور کر دوں

یہ بے رنگیاں کب تک اے حسن رنگیں

ادھر آ تجھے عشق میں چور کر دوں

تو گر سامنے ہو تو میں بے خودی میں

ستاروں کو سجدے پہ مجبور کر دوں

سیہ خانۂ غم ہے ساقی زمانہ

بس اک جام اور نور ہی نور کر دوں

نہیں زندگی کو وفا ورنہ اخترؔ

محبت سے دنیا کو معمور کر دوں

mohabbat ki duniya mein mashhur kar dun

miri sada dil tujh ko maghrur kar dun

tire dil ko milne ki khud arzu ho

tujhe is qadar gham se ranjur kar dun

mujhe zindagi dur rakhti hai tujh se

jo tu pas ho to use dur kar dun

mohabbat ke iqrar se sharm kab tak

kabhi samna ho to majbur kar dun

mire dil mein hai shola-e-husn raqsan

main chahun to har zarre ko tur kar dun

ye be rangiyan kab tak ai husn-e-rangin

idhar a tujhe ishq mein chur kar dun

tu gar samne ho to main be khudi mein

sitaron ko sajde pe majbur kar dun

siyah khana-e-gham hai saqi zamana

bas ik jam aur nur hi nur kar dun

nahin zindagi ko wafa warna akhtar

mohabbat se duniya ko maamur kar dun