مجھ کو دنیا کی تمنا ہے نہ دیں کا لالچ

مجھ کو دنیا کی تمنا ہے نہ دیں کا لالچ

ہائے لالچ ہے تو اک ماہ جبیں کا لالچ

عشق بازی پہ سنا مجھ کو ملامت نہ کرو

حیف ہے جس کو نہ ہو تم سے حسیں کا لالچ

حالت قلب سر بزم بتاؤں کیوں کر

پردۂ دل میں ہے اک پردہ نشیں کا لالچ

جب یہیں طیش میں گزرے تو وہاں کیا امید

نہ رہا اس لئے ہم کو تو کہیں کا لالچ

بوریا تخت سلیماں سے کہیں بہتر ہے

ہم غریبوں کو نہیں تاج و نگیں کا لالچ

نہ میں دنیا کا طلب گار نہ عقبیٰ کی ہوس

آسمانوں کی تمنا نہ زمیں کا لالچ

دل بھی دو جان بھی دو زر بھی دو اس کو پرویںؔ

بڑھ گیا سب سے مرے ماہ جبیں کا لالچ

mujh ko duniya ki tamanna hai na den ka lalach

hae lalach hai to ik mah-e-jabin ka lalach

ishq bazi pe suna mujh ko malamat na karo

haif hai jis ko na ho tum se hasin ka lalach

halat-e-qalb-e-sar-e-bazm bataun kyun kar

parda-e-dil mein hai ik parda nashin ka lalach

jab yahin taish mein guzre to wahan kya ummid

na raha is liye ham ko to kahin ka lalach

boriya takht-e-sulaiman se kahin behtar hai

ham gharibon ko nahin taj-o-nagin ka lalach

na main duniya ka talab gar na uqba ki hawas

asmanon ki tamanna na zamin ka lalach

dil bhi do jan bhi do zar bhi do us ko parwin

barh gaya sab se mire mah-e-jabin ka lalach